“Миллион” жамоаси сардори Даврон Кабулов “Дарё”га берган интервьюсида Яккасарой туман прокуратураси, департаменти ва тумангаз филиали масъуллари ҳақида гапириб, “давлат жиловининг бир ипи қўлимда деб хоҳлаган ишни қилиш керак эмас”, деганди. Бош прокуратура унинг чиқишига муносабат билдирди. Бир неча кундан кейин Даврон Кабулов Instagram тармоғига бу бўйича видео жойлади.
— “Дарё” га берган интервьюмдан кейин Бош прокуратура бундан олти ой аввал эълон қилинган суд қарорининг тафсилотларини оммага ошкор этди. Бу тафсиялотларда ёлғон маълумотлар келтирилган. Отам ҳам, мен ҳам ўғри эмасмиз. Электр энергияси, сув ёки бошқа тўловлар билан ҳам муаммомиз бўлмаган. Буни атрофимиздаги инсонлар жуда яхши билишади.
Бош прокуратуранинг баёнотидан кейин ижтимоий тармоқларда менга ва отамга нисбатан жуда кўп адолатсиз айбловлар ёғдирилди. “Газ ўғрисининг боласи”, “Тўғри яшаш ҳақида ақл ўргатгандан кўра газнинг пулини тўлаб юрсанг, бўлмайдими?” деганлар бўлди. Табиийки, мен ва отамнинг шаъни турган ерда жим туролмадим.
Шу юртнинг сувини ичаман, нонини ейман. Мени боқаётган юртнинг газини ишлатиб, уни тўламасликни ўзимни эп кўрмайман. Баёнотда 2022 йил февраль ойидан бошлаб газдан ноқонуний фойдаланиб келинган дейилган. Аслида эса биз шу йилнинг айни февраль ойида газга уланиш учун рухсат олганмиз. Рухсатномадан кейин қурилиш монтаж ишларини бошлаш ва ҳисоблагич ўтказишгача бўлган жараёнларни амалга оширганмиз. Ҳисоблагич ўрнатишгача бўлган жараён узоқ вақт талаб қилиши ва бюрократик жараён эканлигини умрида бир марта бўлса ҳам газ ўрнатиб кўрган одамлар яхши билишади.
Меҳмонхонамиз 6 сотихли майдонда қурилган, ҳатто ошхонасига ҳам электр печлари ўрнатилган. Бу ер оилавий корхона бўлгани ва турар жой сифатида шакллантирилгани учун подвал қисмига газ мосламаларини ўрнатишга рухсат берилмайди. Меҳмонхона 2023 йилнинг 1 августидан ўз фаолиятини бошлади. Икки ярим ойдан сўнг Яккасарой туман иқтисодий жиноятларга қарши курашиш департаменти ва “Райгаз” ҳамкорликдан рейд уюштиришди. Рейдда “Райгаз”нинг вакили Саидакбар Рихсиев департамент ходимлари билан бирга келди. У аввал ҳам келган аммо бир варақ қоғозга газдан фойдаланишда қандай хатоликларга йўл қўйилаётгани ҳақида ёзиб ўтмаган. Ҳисоблагични ёқиш ва ўчиришни отам иккимиз билмаймиз, унга газ ходимларидан бошқа ҳеч ким тегмаган. Энди фаолиятини бошлаётган тадбиркорлик субъектини камчилиги бўлса аввал огоҳлантириш керак эмасми? Бу ерда бизда айб йўқ, деб ўзимни оқламоқчи эмасман. Тартибини тўлиқ билмаганимиз учун 98 фоиз ҳужжатларни тўғрилаб, охирига келганда бир оз камчиликка йўл қўйганмиз. Лекин бунинг ортида газни пулини тўламаслик ёки сезиб қолишгунигача ноқонуний фойдаланиш мақсади бўлмаган.
Судда ҳам айтдим, “Ишлатган газимизга пул тўлашга тайёрман, ҳатто қарздорлик пеняларини ҳам тўлашдан бош тортмайман. Лекин илтимос емаган сомсамизга 100 баробар ортиғи билан тўлатманглар”, дедим. Чунки 6 йилда қурилган ва икки ойгина ишлаган меҳмонхона ҳали яқин беш йилсиз фойдага кириши даргумон. Қизиғи, энди фаолиятини бошлаган тадбиркорлик субъектига шунча қарзни бўйнига илиб қўйишди. Баёнотни таҳлил қиладиган бўлсак, олти сотихли жойда 344 миллион сўмли газни қандай ёқиши мумкин? Мен метан газ қуйиш шохобчасини очганим йўқ-ку. Биз тўлаган шу пулнинг камида 300 миллион сўмидан биз фойдаланмаганмиз, дейди Даврон Кабулов.
Изоҳ (0)