Қашқадарё вилоятининг Яккабоғ туманида тадбиркорга тегишли савдо дўконини ноқонуний тарзда бульдозерда бузишга уринганида ёқиб юборилган собиқ ҳоким ўринбосари Мансур Туймаев ва туман “Ермулккадастр” ДУК раҳбари (айни кунда Кадастрлар палатасининг Чироқчи туман филиали раҳбари — таҳр.) тумандаги 56 гектар суғориладиган ер майдонини уй-жой қуриш учун фуқароларга бериб юборгани маълум бўлди. Бу ҳақда суд ҳужжатлари билан танишган “Дарё” мухбири хабар берди.
“Масъуллар яъни собиқ ҳоким ўринбосари Мансур Туймаев ҳамда ‘Ермулккадастр’ ДУК собиқ раҳбари Зафар Сафаров лавозимда ўтирган пайтда 56,69 гектар ер майдонини аукцион савдоларисиз тўғридан-тўғри ажратиб бериб, ноқонуний қарорлар имзолаган. Улар ушбу ҳаракатлари билан ерлар аукцион савдоларида ўйналганида савдоларнинг бошланғич тўлови сифатида бюджетга тушиши лозим бўлган 1 миллиард 376 миллион 949 минг сўмлик маблағнинг тўланмай қолишига сабабчи бўлган”, дейди бу ҳақда “Дарё” мухбирига ахборот берган манба.
Суд ҳужжатидан англашилишича, ушбу жиноят иши 2023 йилнинг 12 сентябрь куни Жиноят ишлари бўйича Шаҳрисабз шаҳар судида кўриб чиқилиб, Туймаевга 4 йил-у 2 ой муддатга озодликни чеклаш жазоси тайинланиб, икковлондан давлат фойдасига солидар тартибда 1 миллиард 376 миллион 949 минг сўмлик зарар ундирилиши белгиланган. Айни кунда Кадастрлар палатасининг Чироқчи туман филиали раҳбари сифатида ишлаб келаётган Зафар Сафаровга эса жавобгарликка тортиш муддати ўтиб кетгани учун айбдор деб топилса-да, жазо тайинланмаган. Ҳолбуки, у айни пайтда ҳам мансабдор сифатида фаолият юритмоқда.
“Энг қизиғи Туймаев ва Сафаров Қашқадарё вилоят судининг Жиноят ишлари бўйича судлов ҳайъати апелляция инстанциясига шикоят киритган. Апелляция инстанциясининг 2024 йил 4 апрелдаги ажрими билан Туймаев ҳам худди Сафаров сингари жавобгарликка тортиш муддати ўтиб кетган деган важ билан жавобгарликдан озод қилинган. Шунингдек, давлатга етказилган 1 миллиард 376 миллион 949 минг сўмлик зарарни қоплаш ҳам фақатгина Сафаровнинг зиммасида қолдирилган. Сафаровнинг эса 1 миллиард 376 миллион 949 минг сўмлик зарарни қоплаган ёки қопламагани номаълум”, дейди манба.
Изоҳ (0)