Президент 14 октябрь куни “2024–2026 йилларда иқтисодиёт тармоқларида аэрокосмик технологияларни жорий этиш чора-тадбирлари тўғрисида”ги фармонни қабул қилди.
Фармонга кўра, 2024—2026 йилларда иқтисодиёт тармоқларидаги муаммоларни аниқлаш ҳамда уларни бартараф этиш бўйича самарадорликни ошириш учун қуйидагилар давлат космик мониторингининг устувор йўналишлари этиб белгиланди:
- ер участкаларининг ўзбошимчалик билан эгаллаб олиниши ва бундай ер участкаларида бино ва иншоотлар қурилиши ҳолатларини аниқлаш;
- ўрмон билан қопланган майдонларнинг чегараларини белгилаш ва уларнинг ҳолатини мониторинг қилиш;
- геология соҳасида ер қаъридан ўзбошимчалик билан фойдаланиш, фойдали қазилмалар жойлашган майдонлардан асоссиз равишда ва бошқа мақсадларда фойдаланиш ҳолатларини аниқлаш;
- мавжуд чиқиндиларни сақлаш жойларида белгиланган ҳудуддан ташқарига чиқиш ҳолатларини, янги пайдо бўлган ноқонуний чиқинди зоналарини аниқлаш;
- сув омборларининг лойқа оқизиқлар билан тўлиб боришини, сув сатҳи режимини мониторинг қилиш;
- қишлоқ хўжалиги экин ерларидан самарали фойдаланилишини ўрганиш, экинларнинг турлари ҳамда сув истеъмоли ҳажмларини аниқлаш.
Ҳужжат билан 2024—2026 йилларда иқтисодиёт тармоқларида давлат космик мониторингини амалга ошириш дастури тасдиқланади. Дастур доирасида қуйидаги мақсадли кўрсаткичларга эришилиши назарда тутилади:
- сув сатҳи режими мониторинги амалга ошириладиган сув омборларининг сонини 50 тага етказиш;
- қишлоқ хўжалиги экин ерлари кесимида экин ерларидан фойдаланишнинг жорий ҳолатини, экинларнинг турларини ҳамда ҳақиқатда экилган майдонларини тўлиқ қамраб олиш;
- ер қаъридан ўзбошимчалик билан фойдаланиш, фойдали қазилмалар жойлашган майдонларда асоссиз ва бошқа мақсадларда фойдаланиш ҳолатларини аниқлаш ишлари билан республиканинг барча ҳудудларини қамраб олиш;
- ўрмон билан қопланган барча майдонларнинг чегараларини белгилаш.
2025 йил 1 мартдан ер қаъридан фойдаланиш бўйича масофавий мониторинг ва риск-таҳлил “Геомониторинг” ахборот тизими ҳамда СGM платформаси орқали амалга оширилади.
Олий суд маълумотларига кўра, Ўзбекистонда 2024 йилнинг саккиз ойида ер участкаларини ўзбошимчалик билан эгаллаб олиш, шу жумладан, ушбу ер участкаларига нисбатан қонуний ҳуқуқлари мавжуд бўлмаган ҳолда улардан фойдаланиш бўйича 394 нафар шахс маъмурий жавобгарликка тортилган. маъмурий жазо қўлланилганидан кейин ҳам шундай қилмишни содир этганлик учун 638 нафар шахс жиноий жавобгарликка тортилган.
Изоҳ (0)