Тошкент шаҳар ҳокимлиги 7 ноябрдан иссиқлик энергияси билан босқичма-босқич таъминлаш ишлари бошланишини эълон қилди.
Қайд этилишича, фуқароларнинг кўплаб мурожаатлари ва метеорология хизмати маълумотларига мувофиқ Тошкент шаҳар ҳокимининг қарорига асосан, марказлашган иссиқлик таъминотидан фойдаланувчи истеъмолчиларни иссиқлик билан таъминлаш мақсадида 2024 йил 5 ноябрь соат 00:00 дан бошлаб иссиқлик манбаларидан иссиқлик муҳитининг айланма ҳаракати йўлга қўйилади.
7 ноябрдан иссиқлик энергияси билан босқичма-босқич таъминлаш ишлари бошланади.
Ўтган йилларда Ўзбекистонда иссиқлик берилган саналар:
- 2023 йил — 6 ноябрь;
- 2022 йил — 24 октябрь;
- 2021 йил — 14 октябрь;
- 2020 йил — 17 октябрь;
- 2019 йил — 30 октябрь.
Аввалроқ Тошкент шаҳар ҳокими иссиқлик таъминоти нархини 15 фоизга ошириш бўйича қарор қабул қилгани ҳақида хабар берилган эди. Янги тарифлар тўғрисидаги қарор 12 сентябрь куни халқ депутатлари пойтахт Кенгаши томонидан қабул қилинганди.
Veolia Energy томонидан кўрсатиладиган марказлашган иссиқлик таъминоти хизматлари учун қуйидаги нархлар тасдиқланди:
- тартибга солинадиган базавий нарх ва бюджет ташкилотлари тарифи амалдаги даражасида — 664 465 сўм/Гкал ва 801 963 сўм/Гкал;
- аҳоли учун 121 617 сўм/Гкал;
- бошқа улгуржи ташкилотларга 244 497 сўм/Гкал.
Барча нархлар қўшилган қиймат солиғисиз кўрсатилган.
Veolia Energy матбуот хизмати берган маълумотга кўра, пойтахтда мавжуд 217 та қозонхонанинг 29 тасида мукаммал таъмирлаш ишлари олиб борилган. 76 километр эскирган иссиқлик қувурлари алмаштирилди ва 1,32 километр иссиқлик тармоқлари ер остига олинди. 47,1 километр иссиқлик тармоқларидаги изоляция қопламаси қайта тикланиб, 12 та насос станциялари мукаммал таъмирланди. 92 та насос станцияси эса жорий таъмирланди. 1512 та зулфинлар алмаштирилди. Бу йиллик режани 129 фоизга бажариш дегани. Шунингдек, қиш мавсумида зарур бўладиган захира анжомлари 100 фоиз ҳозирлаб қўйилган.
Изоҳ (0)