Тошкент шаҳрида архитектор Владимир Спивакнинг лойиҳаси асосида 1982 йил қурилиб, 2000 йилдан сўнг қаровсиз ётгани сабаб ташландиқ ҳолга келган Чорсу меҳмонхонаси бузилади.
Ўрнида қиймати 170 миллион доллардан кам бўлмаган замонавий 29 қаватли меҳмонхона, бизнес маркази ва турар-жойлар барпо этилади.
Бу ҳақда 2 ноябрь куни Ҳилтон меҳмонхонасида масъуллар иштирокида бўлиб ўтган матбуот анжуманида маълум қилинди.
Билдирилишича янги меҳмонхона, бизнес-маркази ва турар жойларни қамраб олувчи янги лойиҳани Дрездендаги Постплатз майдони, Берлиндаги EDGE Суэдкреуз мажмуи ва бошқа кўплаб иншоотлар реконструкцияси муаллифи — Тчобан Voss Арчитектен немис компанияси ишлаб чиққан.
Таъкидланишича, мазкур ишлар 2025 йилда бошланади. Қурилишга уч ярим йил муддат сарфланади ва майдоннинг очилиши 2029 йилга мўлжалланмоқда.
Майдоннинг реконструкция қилиниши 620 та янги иш ўрнини яратиб, Тошкент фондига қарийб 113 минг метр квадрат турар-жой ва кўчмас мулкларни қўшади. Вазифа мураккаб ҳамда масъулиятли эканлигини тушунган ҳолда, лойиҳани ишлаб чиқиш учун дунёдаги энг яхши юзта архитекторлар рейтингидан ўрин олган ҳамда ўзининг Европа мамлакатларида, шунингдек Грузия, Озарбайжон ва Россиядаги ишлари билан ном қозонган машҳур архитектор Сергей Чобан томонидан асос солинган Германиядаги Тчобан Voss йирик бюроси таклиф қилинди. Аввало лойиҳада Чорсу меҳмонхонаси ўйнаган доминанталик ролини сақлаб қоламиз. Янги бино Навоий кўчаси истиқболини якунловчи таниш меҳмонхона шакл-шамойилини такрорлайди. Натижада даврлар изчиллигини таъминланиб, шаҳар ландшафтидаги одатий ва таниқли мўлжан – бозор ва мадраса қаторида туманнинг рамзларидан бири сақлаб қолинади, — дейди лойиҳани ишлаб чиқиш гуруҳи раҳбари Андрей Требунских.
Қайд этилишича, ер майдони бўйлаб диагоналига Чорсу бозори ҳамда ёнида ретейл, дўконлар ва кафеларнинг асосий қисми жойлашадиган бош универмаг (ГУМ) биносини ўзаро боғлайдиган булвар ўтади.
Янгиланган меҳмонхона шаҳар меҳмонларини қарши олиш учун муносиб маскан, очиқлик ва меҳмондўстлик рамзига айланади. Унинг қиёфаси замонавий меъморий тенденциялар ва миллий анъаналарни мужассам қилиб, шаҳарнинг ушбу қадимий қисмидаги тарихий мавжудликка ҳурмат билан муносабатда бўлади. Қолаверса замонавий Тошкент рамзларидан бири мақомига даъво қилади. Чорсу майдонининг янги қиёфаси пойтахтнинг эски шаҳарини ўзгартириб юборади. Бу ерда сармоялар ва бизнес учун муҳим тортишиш нуқтаси пайдо бўлади. Биз мажмуамиз энг йирик маҳаллий ва халқаро компаниялар офисларининг уйига айланишини кутмоқдамиз. Замонавий меҳмонхона эса саёҳатчиларга эски Тошкентнинг нақд юрагида энг йирик мегаполислар даражасидаги қулайликда яшаш имконини беради, — дейди лойиҳа ташаббускорлари.
Блогер Никита Макаренко Чорсу меҳмонхонасининг айни кундаги кўриниши жудаям ачинарли эканини, уни қайта тиклаш мақсадга мувофиқмаслигини ёзмоқда.
Меҳмонхонанинг ҳозирги ҳолати уни қайта тиклаш мумкин эмаслигидан далолат бермоқда. У ўсмирлар ўралашиб юрадиган хавфли “ташланган жой”га айланиб улгурди. Аммо унинг тақдири бизга сабоқ бўлиши керак. Ҳалигача сақланиб қолган модернизм ёдгорликларини қаттиқ ҳимоя қилишимиз зарур. Ва ҳозир керак бўлган пайтда таъмирлашни бошланг. Улар парчаланиб кетгунча кутманг, — дейди у.
Тадбирда қатнашган блогер Александра Иванюженко Чорсу йигирма йилдан бери “яшармаганини” таъкидламоқда.
Йигирма йилдирки, шу бино яшармади, натижада шаҳар марказида ташландиқ улкан бино пайдо бўлди. Ҳамма нарсани аввалгидек қолдиришингиз мумкин, аммо бу жуда шубҳали. Архитекторларнинг хулосасига кўра, 14-қаватдан юқорида жойлашган ҳамма нарсани мустаҳкамлаш керак, аммо таъмирлаш ишлари олиб борилган бўлса ҳам бино энди шифт баландлиги талабларига жавоб бермайди, — дейди у.
2020 йилда давлат активларини бошқариш агентлиги томонидан Чорсу меҳмонхонаси биноси E-auksion платформасида очиқ савдолар орқали БААдаги Иттиҳад International Инвестмент LLC компаниясига 16,9 млрд сўмга сотилган. Ҳозирда ўзбекистонлик ва хорижлик инвесторлар консорсиуми лойиҳада иштирок этмасликка қарор қилган. Айтилишича, Иттиҳад International Инвестмент LLC компаниясидан объектни сотиб олиш бўйича битимни ёпиш жараёни амалга оширилмоқда. Битимнинг қиймати ва инвесторлар гуруҳининг таркиби келишувга эришилганидан сўнг эълон қилинади.
2024 йилнинг октябрь ойида якунланган техник экспертизанинг кўрсатишича, ёғингарчилик ва атроф-муҳит таъсири натижасида меҳмонхона биносининг темир-бетон конструкциялари жиддий деформацияга учраб, қисман барбод бўлган. Арматурали ўзаклар 20 фоизгача майдонини йўқотиб, коррозияга учраган. 14-қаватдан бошлаб бино тепасигача барча устунлар ҳисоб талабларига мувофиқ эмас. Экспертиза хулосасига кўра, бино реконструкция қилиниши мумкин эмас, дейди матбуот анжуманида сўз олганлар.
Маданий мерос агентлигининг Тошкент шаҳар бошқармаси масъулига кўра, Чорсу меҳмонхонаси қўриқланадиган мақомга эга эмас ва шу пайтга қадар маданий мерос объекти сифатида умуман рўйхатда турмаган.
Изоҳ (0)