Қашқадарё ва Самарқанд вилоятларида фойдали қазилмаларни ўзбошимчалик билан қазиб олиш ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Муборак туманидаги “Ж.” фермер хўжалиги раҳбари Ф.Б. ва бошқалар хўжаликка қарашли ер майдонида норуда фойдали қазилма ҳисобланган табиий қумни ўзбошимчалик билан қазиб олган.
Натижада давлат ва жамият манфаатларига 676,1 млн сўм зарар етказилган.
Шунингдек фуқаро С.Ю.га ушбу ер майдонидан қум қазиб олишга рухсатнома олиб бериши эвазига 100 млн сўмни фирибгарлик йўли билан қўлга киритган.
Бундан ташқари, “Р.У.” МЧЖ ва “М.Р.” фермер хўжалиги масъул шахслари Пайариқ тумани, “Томойрот” МФЙ ҳудудидаги ер майдонларидан қум-шағал аралашмасини ўзбошимчалик билан қазиб олган.
Оқибатда давлат ва жамият манфаатларига 382,8 млн сўм зарар етказилган.
Мазкур ҳолатлар юзасидан Жиноят кодексининг 192-11-моддаси (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш), 229-моддаси (ўзбошимчалик) ва 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Чирчиқ дарёсидан қум-шағал аралашмаси қазиб олиниши оқибатида табиатга 273,8 млрд сўм зарар етказилгани ҳақида хабар берилганди.
Изоҳ (0)