Ҳиндистоннинг Гужарат штати суди сигир контрабандасида гумон қилинган шахсни умрбод қамоқ жазосига ҳукм қилди. Ҳукм ўқилар экан, судья Самир Винодчандра Вяс сигир сўйиш тўхтаса, дунёдаги барча муаммолар ҳал бўлишини айтди.
«Ерга бир томчи ҳам сигир қони тўкилмайдиган кунда барча муаммолар ҳал бўлади ва фаровонлик ҳукм суради», — дейилади суд қарорида. Шунингдек, сигир нафақат ҳайвон, балки она ҳам экани таъкидланган.
«Сигирларга ёмон қараш ва сўйиш қайғули масала», — деб давом этди судья ва «сигир гўнгидан қурилган уйларга атомнинг нурланиши таъсир қилмаслигини, сигирдан олинган маҳсулотлар кўплаб давосиз касалликларга малҳам бўлишини» қўшимча қилди. Вяснинг таъкидлашича, сигирлар сони кескин камайиб кетган ва кун келиб, улар фақат суратларда қолиши мумкин.
«Бугунги кунда мавжуд муаммолар жаҳлдорлик ва қайноқ темпераментнинг тарқалиши билан боғлиқ. Уларнинг ёйилишига ягона сабаб сигирларни сўйишдир. Бу бутунлай тақиқланмагунча, иқлим ўзгариши частотаси ўз таъсирини кўрсата олмайди», — дейилади суд баёнотида.
Маълумот учун, ҳиндуизмда сигир муқаддас ҳайвон ҳисобланади, у поклик ва фаровонликни ифодалайди.
Эркак 2017 йилдаги Гужарат ҳайвонларни асраш тўғрисидаги қонун, 1960 йилдаги Ҳайвонларга шафқатсиз муносабатда бўлишнинг олдини олиш тўғрисидаги қонун, 1975 йилдаги Гужарат ҳайвонларни ташишни назорат қилиш тўғрисидаги фармойиш, 2015 йилдаги Гужаратдаги асосий товарлар ва ҳайвонларни назорат қилиш тўғрисидаги қонун, шунингдек, 2015 йилдаги Автомобильлар тўғрисидаги қонунга мувофиқ жиноий жавобгарликка тортилган.
Изоҳ (0)