Самарқанд вилоят суди Иқтисодий ишлар бўйича судлов ҳайъатининг тафтиш инстанцияси МИБнинг Нишон туман бўлими тракторини ноқонуний олиб қўйиб, 49 кун давомида жарима майдонида сақлаши оқибатида фермерга 355 миллион сўм зарар етказгани билан боғлиқ ҳолатни кўриб чиқмоқда. Бу ҳақда “Дарё” журналисти хабар берди.
Судья Муродов раислигида, томонлар ва президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил иштирокида 2024 йилнинг 22 июль куни соат 16:30 да бошланган суд мажлисида ОАВ вакиллари иштирокига рухсат берилди, бироқ жавобгар томон норозилигига асосан журналистларга фото ва видео олишга тақиқ қўйилди.
Судда аниқлаштирилишича, МИБнинг Нишон тумани бўлими ходимлари “Самандар нур” фермер хўжалигининг 35 миллион сўмлик солиқ қарздорлигини ундириш учун 2022 йил 1 февралдан 23 октябргача 5 та ижро иши қўзғатиш тўғрисида қарорлар қабул қилинишига қарамасдан, фермерни ижро иши қўзғатилгани тўғрисидаги қарорлар билан таништирмаган ҳолда гаровда турган ҳайдов тракторини хатлаган. Ва техникани аукционда сотиш учун фермер даласидан олдиндан огоҳлантиришсиз олиб кетган.
Шундан сўнг фермер қарздорлик нотўғри ҳисобланганини, олдиндан бу ҳақда огоҳлантирилганда, масалага ойдинлик киритиб, қарзини тўлаган бўлишини бир неча бор таъкидлашига қарамасдан, давлат ижрочилари буларни эътиборсиз қолдирган.
Бундан ташқари, 35 млн сўмлик қарздорлик учун ундирув номутаносиб миқдордаги мулкка, яъни 977,5 млн сўм кредит маблағи эвазига сотиб олинган тракторга қаратилиб, олиб кетилган.
2024 йилнинг 5 февраль куни ишни кўриб чиққан Қарши туманлараро иқтисодий суди Мажбурий ижро бюросининг Нишон тумани бўлимидан менинг фойдамга 355 миллион сўм ундириш тўғрисида қарор чиқарганди. Нега бунча зарар ва бу маблағ нима учун менга тўлаб берилиши керак деган савол туғилиши табиий. Агар МИБнинг туман бўлими ноқонуний хатти-ҳаракатни амалга ошириб, техникамни 49 кун ноқонуний ушлаб турмаганида мен 57 та фермер хўжалиги билан тузилган шартнома шартларини бажариб, ушбу трактор ёрдамида кунига 7 миллион 249 минг сўмдан, жами 355 миллион сўм даромад топган бўлар эдим. Шу сабаб МИБ келтирилган зарарни қоплаб беришини талаб қиляпмиз, деди судда сўз олган фермер.
Судлов ҳайъати фермерга савол билан юзланар экан, фермер хўжалигида тракторчи-механик штати бор-йўқлиги ва тракторчиларга айтилаётган муддатда қанча маош тўлаб берилгани билан қизиқди. Фермер даъвосини қўллаб-қувватлаётган Нишон туман фермер, деҳқон хўжаликлари ва томорқа ер эгалари Кенгаши вакили ҳамда фермер бундай ҳужжатлар мавжудлигини, кейинги судда тақдим қилишини билдирди. Фермер шунингдек, у билан ер ҳайдаш бўйича шартнома қилган 57 та фермер хўжалиги раҳбарларини судга гувоҳ сифатида таклиф қилишни сўради. Суд бу ҳақда расмий илтимоснома киритилса, муҳокама қилишини айтди.
Судда жавобгар томон вакили сифатида иштирок этаётган МИБнинг Нишон туман бўлими бошлиғи ўринбосари Зайниддин Бозоров фермер даъвосини рад этмоқда.
Суд 2024 йилнинг 29 июль куни соат 11:00 га қадар қисқа муддатли танаффус эълон қилди.
Изоҳ (0)