Андижонда МИБ ходимини пичоқ билан жароҳатлаган фуқаро уч йилга озодликдан маҳрум қилинди

Жиноят ишлари бўйича Марҳамат туман суди томонидан Мажбурий ижро бюроси Асака туман бўлими ходимини ҳақорат қилиб, уни пичоқ билан жароҳатлаган фуқарога нисбатан суд ҳукми ўқилди. Бу ҳақда «Дарё»га МИБ вилоят бошқармаси ахборот хизмати хабар бермоқда.

Эслатиб ўтамиз, Андижонда фуқаро МИБ ходимини пичоқ билан жароҳатлагани ҳақида 13 январь куни хабар берилган эди.

Фуқаролик ишлари бўйича Асака туманлараро судининг 2021 йил 21 октябрдаги ижро варақасига кўра, қарздор А.Ж. томонидан Асака тумани Нажмиддин Кубро кўчасида жойлашган автошоҳбекатнинг йўловчилар учун мўлжалланган кутиш қисмида ўзбошимчалик билан қуриб олинган савдо дўкони қурилмаси ўзининг ҳисобидан мажбурий тартибда буздирилиши белгиланган.

2022 йилнинг 11 январида ноқонуний қурилмани бузиш учун ваколатли идоралар вакиллари иштирокида мажбурий ижро ҳаракатлари ўтказилган. Ижро ҳаракатлари давомида қарздорнинг ўғли С.Ж. дўконда бўлган ошхона пичоғи билан тарафларни қўрқитиб, давлат ижрочиси Х.Меҳмоновга тан жароҳати етказган. Натижада мажбурий ижро ҳаракатлари бошқа кунга қолдирилган.

«Ўша куни МИБ ходимлари шу дўконни бузишимни ва автобекатни ўз ҳолига келтириб қўйишимни айтишди. Ҳеч қандай қаршиликларсиз ишга тушдим. Жараёнларни кўргач, улар кетди. Бир муддат ўтгач, яна икки нафар МИБ ходими келди. Улар ўзини таништирмади. Ёнимга келиб, бу ер ўзи тўлиқ бузилиши кераклигини айтиб, нега мендан бу реклама банерларни олаётганимни сўрашди. Уларга жавобан эрталаб ҳамма ваколатли орган вакиллари келганини, менга шундай топшириқ берганини, дўкондаги рекламаларни олиб ташлаб, юмшоқ ўриндиқлар ўрнига қаттиқ стуллар қўйишимни айтишганини тушунтирдим. У эса бирданига ‘Буларга жарима солиш керак, жиноий иш қўзғаш керак’ деб отам ҳақида номақбул сўзларни гапирди. Шундан кейин ўзимни йўқотиб қўйдим. Саксон ёшдан ошган отам ҳақида ёмон гапирганига чидаб туролмадим. Шу ёшимда яна отамга гап олиб бераманми, деган хаёл ўрнашиб қолди миямга. Шундан кейин тортишиб кетдик. Қўлимдаги хўжалик пичоғи билан уни қувладим. Тўғриси, ўзимни қўлга ололмай қолдим ўша пайт. Мақсадим уларни қўрқитиб қўйиш эди холос. Бундай бўлишини истамагандим», — дейди судланувчи.

Судья Зарифжон Раҳимов С.Ж.ни Жиноят кодексининг 219-моддаси 2-қисмида назарда тутилган жиноятни содир этганликда айбдор деб топиб, унга нисбатан уч йил муддатга озодликдан маҳрум қилиш жазосини тайинлаган.