Бетт Гремм
90 йиллар бошида ручкани ўчирувчи махсус восита ихтиро қилинмаган эди. Ёзувдаги хатони тўғрилашнинг ягона усули уни қайта печатлаш машинасида ёзиш эди. Ажримдан сўнг Хюстондан нотаниш Далласга кўчиб келган Бетт машинада ёзувчи-котиба сифатида иш бошлади. Унинг вазифаси ёзув машинасида турли ҳужжатлар матнини териш бўлган. Иш кунларининг бирида Гремм lawful (қонуний) сўзининг ўрнига awful (ёмон) деб адашиб ёзиб қўйган. Хатони тўғрилашга эса узоқ вақт кетар эди. Узоқ ўйлаб, эртаси куни у офисга эмульсияли оқ бўёқ ва чўтка билан кириб келди.
Корректорлик иши бўйича илк тажриба бесамар бўлгач, Бетт бўёққа туз, сув, сода каби кимёвий маҳсулотлар қўшиб, тажриба қила бошлади ва яхши натижага эришди. Шу тариқа liquid paper — ручкани ўчирувчи бўёқ ихтиро қилинди. Корректор-бўёқ кейинчалик такомиллаштирилиб, ишлаб чиқарилиш йўлга қўйилди. Фарзандини ёлғиз катта қилаётган она шу тариқа молиявий ташвишсиз кексалик ва ўғли учун порлоқ келажакка пойдевор қурди.
Жой Мангано
Бу аёлнинг тақдири “Жой” номли фильм эфирга узатилгандан сўнг кенг жамоатчиликка маълум бўлган. Турмуш ўртоғи билан ажрашган Мангано кичкина квартирада уч фарзанди билан ёлғиз яшар эди. Бир куни у тасодифан шиша идишни синдириб қўяди ва ердаги шиша парчаларини тозалаш вақтида қўлини шикастлайди. Шунда аёлнинг хаёлига ажойиб фикр келади ва Мангано сувини сиқиш учун қўллар билан пол латтага тегинишга ҳожат бўлмаган Мираcле моп номли полювгични ўйлаб топади.
Орадан бир неча ой ўтиб эса Жой рўзғор буюмлари ўрин олган дўкон очади. Телеэкран орқали ўз маҳсулотининг афзалликлари ҳақида айтиб берганидан кейин 18 минг дона полювгич сотишга муваффақ бўлади. 2 йил ўтиб эса йиллик даромади 1 миллион долларни ташкил қиладиган кампания эгасига айланади.
Фото: Marie Claire
Шери Шмелзер
Шери исмли аёл миллион долларлик ғояни кутилмаганда ўйлаб топган. Унинг фарзандлари тешикли шиппакларни яхши кўрарди. Аёл болаларининг пойабзалларини қизиқарли бўлишини истаб, тешикларни турли предметлар: гул, тугма ва лойдан ясалган шакллар билан безай бошлайди. Болалари мактабга кийиб борганидан кейин пойабзаллар бошқа ўқувчиларга ҳам ёқиб қолади ва уларнинг ота-оналари шиппакларини худди шундай безаб беришни илтимос қилади.
Шери ижод намуналарини жиббиц деб номлайди ва кейинчалик ертўлада ўзининг кичик ишлаб чиқариш цехини очади. Аввалига донаси 3 долларга сотилган жиббицлар бир неча йил ўтиб бутун дунёга машҳур бўлиб кетади. Шмелзер эса ўз маҳсулотини Crocs кампаниясига 20 миллион доллар эвазига сотиб юборади.
Жули Дин
Буюк Британиянинг The Cambridge Satchel Company бренди ташкил этилганига 10 йилдан ошмаган. Мазкур кампания портфел кўринишидаги сумкалар ишлаб чиқаради. Cambridge сатчел номли сумка ғояси уй бекаси Жули Динда пайдо бўлган. Молиявий қийинчиликни бошидан ўтказаётган ва фарзандларини ёлғиз тарбиялаётган она янги сумка чизмасини ишлаб чиқади ва ўзи танлаган ательеда сумкани чарм матодан тиктиради. Аввалига портфелни интернет дўконларда мактаб ўқувчилар учун сота бошлайди.
Кейинроқ Жули савдони мактаб аудиторияси билан чекламасликка қарор қилиб, мода блогерларига мурожаат қилади. У янги бренди ҳақида тавсифнома ва жозибали фотосуратларни ўз ичига олган хатни ёзиш учун кўп вақт сарфлади. Хатда у агар сумкалар маъқул келса, расм ўрнига ҳақиқий портфелларни юборишини ваъда қилади. Ва унинг орзуси амалга ошади: New York Fashion Week — 2011 арафасида Elle UK муҳаррирлари Жулига жавоб беради ва сумкаларнинг бир нечта намуналарини тақдим этишни сўраб, мурожаат қилади. Мода ҳафталигида кўргазмага қўйилган сумкалар кўплаб мода ихлосмандларига ёқади ва Жули машҳур бренд билан шартнома тузади. Ҳозирда Cambridge сатчел сумкаси 10 га яқин давлатларда сотувга қўйилган.
Изоҳ (0)