Ўтган саккиз ойда Маъмурий жавобгарлик тўғрисидаги кодекснинг 60-моддаси билан 394 нафар шахс маъмурий жавобгарликка тортилган. Бу ҳақда бугун, 14 октябрь куни АОКАда ўтказилган брифингда Олий суд ахборот хизмати раҳбари Азиз Обидов маълум қилди.
Олий суд матбуот хизматига кўра, жорий йилнинг ўтган саккиз ойи мобайнида эса Маъмурий жавобгарлик тўғрисидаги кодекснинг 60-моддаси билан 394 нафар шахс маъмурий жавобгарликка тортилган.
Маъмурий жавобгарлик тўғрисидаги кодекснинг 60-моддасига мувофиқ ер участкаларини ўзбошимчалик билан эгаллаб олиш, шу жумладан, ушбу ер участкаларига нисбатан қонуний ҳуқуқлари мавжуд бўлмаган ҳолда улардан фойдаланиш — фуқароларга БҲМнинг йигирма беш баравари (9 миллион 375 минг сўм), мансабдор шахсларга — эллик баравари (18 миллион 750 минг сўм) миқдорида жарима солишга сабаб бўлади.
Шунингдек, ўзбошимчалик билан эгаллаб олинган, ажратилган ер участкасига туташ бўлган ва туташ бўлмаган ер участкаларида қурилиш ишларини амалга ошириш — фуқароларга БҲМнинг бир юз эллик баравари (56 миллион 250 минг сўм), мансабдор шахсларга — уч юз баравари (112 миллион 500 минг сўм) миқдорида жарима солишга сабаб бўлади.
Шу билан бирга, ер участкаларини ўзбошимчалик билан эгаллаб олиш, шу жумладан, ушбу ер участкаларига нисбатан қонуний ҳуқуқлари мавжуд бўлмаган ҳолда улардан фойдаланиш, худди шундай ҳаракатлар учун маъмурий жазо қўлланилганидан кейин содир этилган бўлса, Жиноят кодексининг 229-1-моддасига асосан, жавобгарликка сабаб бўлади. Ушбу модда билан 638 нафар шахс жиноий жавобгарликка тортилган.
Бундан ташқари, Жиноят кодексининг 229-6-моддасида суғориладиган ер участкасига ёки унинг бир қисмига бўлган ҳуқуқни сотиш ёхуд қонунга хилоф равишда бошқача тарзда ўзга шахсга берганлик учун жавобгарлик белгиланган бўлиб, бунинг учун БҲМнинг тўрт юз бараваридан (150 миллион сўм) беш юз бараваригача (187 миллион 500 минг сўм) миқдорда жарима ёки муайян ҳуқуқдан маҳрум қилиб, икки йилдан беш йилгача озодликни чеклаш ёхуд беш йилгача озодликдан маҳрум қилиш жазоси белгиланган. Мазкур модда билан 47 нафар шахсга нисбатан жиноий жазолар тайинланган.
Маълумот учун, 2023 йил Маъмурий жавобгарлик тўғрисидаги кодекснинг 60-моддаси билан 335 нафар шахсга нисбатан маъмурий жазо тайинланган. Жиноят кодексининг 229-1-моддаси билан боғлиқ жиноят ишларини кўриб чиқиш натижасида 587 нафар шахс судланган. Жиноят кодексининг 229-6-моддаси билан 44 нафар шахсга айблов ҳукми чиқарилган.
Изоҳ (0)