Қирғизистон президенти Садир Жапаров мамлакат мадҳияси ўзгаришини қўллаб-қувватлади. У “Кабар” агентлигига берган интервьюсида ўз фикрини билдирди.
Сиёсатчи бунинг ҳеч қандай салбий жиҳати йўқлиги, амалдаги мадҳия 33 йил аввал, Қирғизистон мустақилликка эндигина эришган пайтда ёзилганини айтди.
Биз энди мустақилликка эришиб, ўз тақдиримизни қўлимизга олиб, олдинга интилаётган эдик — мадҳия муаллилари айнан шундай қувонч ва ҳаяжон билан ёзган эди. Ўшандан буён 33 йил ўтди. Биз давлат сифатида тўлиқ шаклландик. Бизни бутун дунё тан олмоқда. Юз йилдан кейин ҳам озод бўлганимиз ва мустақил давлатга айланганлигимиз ҳақида куйлаб юрамизми?, деди у.
Жапаров Қирғизистон мустақиллиги, унинг 5000 йиллик тарихи акс этган, ёшлар ва келажак авлодларни илҳомлантирадиган мадҳия ёзиш мумкинлигини айтди. У амалдаги мадҳия ҳам унутилмаслиги, мамлакат тарихида қолишини таъкидлади.
Баъзи демократлар ва популистлар байроқни ўзгартириш ғоясига қарши чиқди. Ҳозирги байроғимиз ёмонми? Бу аввалги байроқ билан солиштирганда олдинга ташланган қадам эди. Эски байроғимиздаги қуёш рамзи ё кунгабоқарга, ё "ёғоч арралаш" белгисига ўхшарди. Ҳозирги байроқни кўрган ҳар қандай киши унинг қуёш нури эканини дарҳол тушунади. У чарақлаб турибди, деди сиёсатчи.
Жапаров мадҳияни ўзгартириш шошилинч ҳал қилинмаслигини айтди. У аввал янги мадҳия ёзилиши, сўнгра у халққа тақдим этилишини билдирди.
Қирғизистон президенти фикрича, мадҳия ёш болалардан тортиб кексаларгача барча учун тушунарли бўлиши, байрамларда ва концертларда ижро этилиши керак.
Мадҳия мазмуни юртимизни улуғлаши, фуқароларни ватанпарварликка, бирликка, тотувликка ундаши, мамлакатимизнинг абадий нажоти ҳақидаги ғояларни ўз ичига олиши лозим. Наҳотки биз умр бўйи озод бўлганимиз ҳақида гапирсак?, деди у.
Изоҳ (0)