Қирғизистон парламенти мамлакат байроғини ўзгартириш тўғрисидаги қонун лойиҳасини муҳокамаларсиз иккинчи ва учинчи ўқишда қабул қилди. Бу ҳақда АКИ Пресс хабар бермоқда.
Қирғизистон байроғидаги нурлар шаклини тўлқинсимон шаклдан айнан қуёш нурларига ўхшаш шаклга ўзгартириш таклиф қилинмоқда. Қонун лойиҳаси ташаббускорлари – парламент спикери Нурланбек Шакиев ва депутат Улан Примов ҳисобланади.
“Бугунги кунда Қирғизистон Республикаси байроғидаги ўртада тундук билан қуёш нурларини турли талқинларда, масалан, кунгабоқар гули ёки ўтхонанинг пардаси каби визуал идрок этишда дилемма мавжуд. Байроқ тасвири маъносининг ноаниқ талқинини бартараф этиш чораларини кўриш зарур”, — дея таъкидлаган қонун лойиҳаси муаллифлари.
Қонун лойиҳасини қабул қилиш учун 59 депутат овоз берган, 5 нафари қарши чиққан.
Қирғизистон байроғини ўзгартиришни президент Садир Жапаров ва Миллий хавфсизлик давлат қўмитаси раҳбари Қамчибек Ташиев ҳам қўллаб-қувватлаганди.
Жапаров байроқнинг ўзига хос вариантини таклиф қилиб, “Агар Худо хоҳласа, бу вариант ўтса, бундан буён қарам бўлмаймиз”, деди. У байроқ ўзгартирилгандан сўнг, Қирғизистон “қуёш нурлари каби ривожланган ва мустақил давлат” бўлишини қўшимча қилди.
Байроқни ўзгартириш жамоатчиликнинг танқиди ва норозилигига сабаб бўлди. Аммо шунга қарамай, 28 ноябрь куни Жогорку Кенешнинг тегишли қўмитаси бир овоздан байроқни ўзгартиришни қўллаб-қувватлади. Бир кундан кейин қонун лойиҳаси парламент ва Вазирлар Маҳкамаси томонидан биринчи ўқишда қўллаб-қувватланди.
Изоҳ (0)