Қирғизистон ва Италия маҳкумларни экстрадиция қилиш ва топшириш бўйича келишувларни имзолади, деб хабар қилди Қирғизистон президенти Садир Жапаров матбуот хизмати.
Хабарда айтилишича, 3 октябрь куни Италияга ташрифи доирасида Жапаров Италия бош вазири Жоржа Мелони билан учрашган. Учрашув якунлари бўйича томонлар қўшма баёнот қабул қилган.
“Қирғизистон ва Италия ўртасида экстрадиция қилиш, маҳкумларни топшириш тўғрисидаги битим, Қирғизистон Вазирлар Маҳкамаси ва Италия ҳукумати ўртасида қўшма ишлаб чиқариш тўғрисидаги келишув, аудиовизуал маҳсулотлар ишлаб чиқариш ҳамда Қирғизистон ва Италия Адлия вазирликлари ўртасида ҳамкорлик меморандум имзоланди”, дейилади хабарда.
Мелони билан музокаралар чоғида Жапаров расмий ташрифидан кўзланган асосий мақсад Қирғизистон Италиянинг ишончли ҳамкори эканини тасдиқлаш эканини таъкидлаган.
“Бугунги кунда халқаро ҳамкорликни мустаҳкамлаш ва хорижий сармояларни жалб этиш асосий вазифалардан бири бўлиб, бу борада Италия Қирғизистон учун истиқболли ҳамкорлардан биридир”, дея қўшимча қилган Жапаров.
У, шунингдек, Италия Вазирлар кенгаши раисини Бишкекга расмий ташриф буюришга таклиф қилган.
Изоҳ (0)