Қирғизистонда парламент спикери Нурланбек Шакиев мамлакат мадҳияси қайта ёзилишини маълум қилди. Бу ҳақда 24.kg хабар берди.
Биз ҳозирги мадҳиямизни Совет Иттифоқи таркибидан чиққанимиздан сўнг қабул қилган эдик. Ҳозир биз оёққа турган ва тараққиёт йўлидан бораётган давлатмиз. Шунинг учун мадҳиямизни ўзгартиришимиз лозим. У шундай бўлиши керакки, ҳамма куйласин, деди Нурланбек Шакиев.
Қирғизистон давлат мадҳияси 1992 йил 18 декабрда Қирғизистон Олий Кенгашининг қарори билан тасдиқланган. Дастлаб у учта банд ва нақаротдан иборат бўлган, аммо 2012 йил 27 декабрда Жогорку Кенешнинг қарори билан иккинчи банд чиқариб ташланган.
2023 йил декабрь ойида Қирғизистон давлат байроғи расман ўзгартирилганди. Жумладан, байроқдаги қуёш нурларининг тўлқинсимон шакли тўғри чизиққа ўзгартирилган. Тегишли ташаббус президент Садир Жапаров томонидан илгари сурилганди. У ва ўзгариш тарафдорлари байроқ марказидаги қуёш нурлари тўлқинсимон бўлгани сабабли “одамларни чалғитиши, жумладан, кунгабоқар гулига ўхшаб қолаётгани”ни айтганди.
Изоҳ (0)