Норвегия марказий банкига қарашли 2 триллион долларлик йирик бойлик жамғармаси Исроил компанияларига киритган сармояларини қайтариб олади. Бу ҳақда Al Jazeera хабар берди.
Маълум қилинишча, жамғарма Исроилдаги барча шартномаларни бекор қилган ва 61 та компаниядан 11 тасидаги улушларини сотиб юборган. Бу қарор ўтган ҳафта мамлакатда бошланган фавқулодда текширув ортидан қабул қилинган. Текширув жамғарманинг яҳудий компанияси “Bet Shemesh Engines”да улуши борлигини аниқлаган эди (компания Исроил қирувчи самолётларига двигатель етказиб беради).
Жамғарма раҳбари Николай Танген инвестицияларни бекор қилиш ташаббусини Ғазодаги “гуманитар инқироз” билан боғламоқда.
“Улушларнинг деярли ҳаммасини сотиб юбордик. Ушбу чоралар фавқулодда вазиятлар сабабли амалга оширилмоқда. Ғазодаги вазият жиддий гуманитар инқироздир. Биз уруш ҳолатидаги мамлакатда фаолият юритаётган компанияларга сармоя киритаётган эдик. Сўнгги пайтларда Ғарбий Соҳил ва Ғазодаги шароитлар жуда оғир. Бунга жавобан биз тегишли қарорларни қабул қилдик ва текширувларни янада кучайтирамиз”, дейилади жамғарма баёнотида.
Сўнгги йилларда Норвегия ҳукумати ва йирик молия институтлари Исроил билан иқтисодий алоқаларни қисқартириш бўйича босим остида қолмоқда. Июнь ойида Норвегиянинг энг йирик пенсия фонди ҳам Исроил билан ҳамкор компаниялар билан алоқани узган эди. Бу пайтда БМТнинг фаластинлик ҳудудлар бўйича махсус маърузачиси Франческа Альбанесе эса мамлакатларни Исроил билан барча савдо ва молиявий алоқаларни тўхтатишга, қурол эмбаргосини жорий этишга чақирмоқда.
Изоҳ (0)