Қирғизистон президенти Садир Жапаров республика давлат байроғига ўзгартириш киритиш таклифини қўллаб-қувватлади. Бу ҳақда у “Кабар” миллий агентлигига берган интервьюсида айтиб ўтди.
Жапаров жамиятда байроқ кунгабоқарга ўхшаши ва бунинг фонда мамлакат кўтарила олмаслиги ҳақида фикрлар бўлганини эслади.
“Ҳатто бизга ташриф буюрган хорижликлар, эҳтимол, мамлакатимизда кунгабоқар кўп ўсишини айтган ҳолатлар бўлган. Очиқ гапирсам, мустақилликка эришганимиздан бери биз ташқи дунёга қаттиқ қараммиз. Шу сабабли байроғимиз кўринишини қайта кўриб чиқиш вақти келгандир. Бу амалиёт дунёнинг кўплаб мамлакатларида мавжуд бўлиб, байроқ элементларига маълум ўзгартиришлар киритилган”, — деди Қирғизистон президенти.
Садир Жапаров депутатларнинг ташаббусига тўхталиб, улар байроқ концепциясига ўзгартириш киритишни таклиф қилмаётганини таъкидлади.
“Улар фақат қуёш нурларини кунгабоқар билан таққосламаслик учун ўзгартиришни таклиф қилди. Ростини айтаман, улар таклиф қилган вариант менга ҳам ёқмаганди. Бир камчилик бордек туюлди. Қуёш нурлари тиканларга ўхшарди. Бир кун олдин, мутахассислар билан маслаҳатлашгач, улар бу масалани тузатди. Тузатилган версия ҳақиқатан ҳам қуёш нурларига ўхшайди”, — дейди сиёсатчи.
Жапаров тегишли вариант қабул қилинса, мамлакат бундан буён қарам бўлиб қолмаслигини айтди.
“Бундан буён гўё қуёш порлаб, бизга табассум қилаётгандек бўлади. Мен ҳар қандай эътиқод ва хурофотлардан узоқман. Лекин барибир биз бундан буён ривожланган ва мустақил давлат бўламиз, деб умид қиламан”, — деди у.
Изоҳ (0)