Қирғизистон президенти Садир Жапаров собиқ давлат раҳбари Асқар Акаев ўз даврида жиддий хатоларга йўл қўйганини айтди. Бу ҳақда у “Кабар” агентлигига берган интервьюсида маълум қилди.
У Акаев биринчи навбатда хусусийлаштириш жараёнини назорат қила олмагани, ҳокимиятга эга бўлган одамлар халқ мулкини талон-тарож қилганини айтди.
Завод ва фабрикалар вайрон қилинди, станоклар чет элга сотилди. Иккинчидан, қишлоқ хўжалиги таназзулга юз тутди. Бу Акаевнинг айби эмас, чунки у агроном эмас, балки олим. Буни лаёқатсиз демагог вазирни айблаш мумкин. Бу лавозимга марҳум Жумгалбек Аманбоев каби кучли мутахассисни тайинлаш керак эди. Асқар Акаевич кадрлар танлашда хатога йўл қўйган.
Президентнинг қўшимча қилишича, собиқ давлат раҳбарининг учинчи асосий хатоси — у халқни қувғин қилиш даражасига олиб келган.
Агар Акаев ўз вақтида кетганида эди, ҳозир унинг портретлари биринчи президент сифатида ҳамма жойда осиғлиқ турарди. Агар 99 та яхши иш қилсанг, кейин бир марта хато қилсанг, халқ кечирмайди. Ёмон ишлар ҳеч қачон унутилмайди. Инсоннинг табиати шундай, бундан хафа бўлиш мумкин эмас, деди Жапаров.
Изоҳ (0)