Британиялик UFC жангчиси Майкл Пейж 17 август куни АҚШнинг Чикаго шаҳрида бўлиб ўтадиган UFC 319 турнирида ўтказиладиган ўрта вазн тоифасидаги чемпионлик жанги — Дрикус дю Плесси ва Ҳамзат Чимаев тўқнашуви ҳақида ўз фикрини билдирди.
Унинг фикрича, ушбу баҳсда асли Чечинистондан бўлган швециялик Чимаев фаворит, аммо Дрикус ҳам осонликча мағлуб бўлмайди:
Менимча, Ҳамзат уни мағлуб эта олади. Аммо ҳар сафар “энди ҳеч қачон Дрикусга қарши фикр билдирмайман” деб ўзимга айтаман. Чунки у қандайдир йўл билан доим ғалаба қозонади. Унинг услуби менга бир оз тартибсиздек туюлади, лекин Дрикусга муносиб баҳо бериш керак, — деди Пейж MMAJunkie нашрига берган интервьюсида.
Маълумот учун, 2025 йилнинг 17 август куни АҚШнинг Чикаго шаҳрида UFC 319 турнири бўлиб ўтади. Кечанинг марказий жангида ўрта вазн (84 кг) чемпиони Дрикус дю Плесси чемпионлик камарини ҳимоя қилади. Унинг рақиби — Ҳамзат Чимаев.
Чимаев сўнгги жангини 2024 йил октябрь ойида UFC 308 турнирида ўтказган бўлиб, биринчи раунддаёқ австралиялик собиқ чемпион Роберт Уиттакер устидан ғалаба қозонган.
Жанубий африкалик Дрикус дю Плесси эса сўнгги жангини 2025 йил февраль ойида UFC 312 турнирида америкалик собиқ чемпион Шон Стриклендга қарши ўтказган ва ҳакамларнинг якдил қарори билан ғолиб бўлган.
Изоҳ (0)