Эронда 11 нафар эрини ўлдирганликда айбланаётган Колшум Акбарийга қарши суд жараёни бошланди. Бу ҳақда Al Arabiya хабар берди.
Жиноятлар 2001 йилдан 2023 йилгача содир этилган. Акбарийнинг 20 дан ортиқ турмуш ўртоғи бўлган, уларнинг аксарияти вафот этган. Терговчилар фикрича, аёл эрларини ўлдириб, ҳар сафар уларнинг меросига эга чиққан. Акбарий дастлабки қотилликларидан бирида эрини техник спирт билан заҳарлаган, сўнгра ёстиқ билан бўғиб ўлдирган. Шундан кейин у марҳумнинг катта ер майдонини мерос сифатида қўлга киритган.
Акбарий қайта турмушга чиқишдан олдин ўзига тўқ кекса эркакларни танлаб, уларнинг молиявий аҳволини ўрганган, дейди Эрон оммавий ахборот воситалари.
Аёл жами 18 та вақтинчалик никоҳ ва 19 та доимий никоҳ тузган, буларнинг барчаси эрларининг ўлими билан якунланган. Эронда вақтинчалик никоҳ (мута) муносабатларни маълум муддатга — бир соатдан бир неча йилгача расман қайд этиш имконини беради.
Терговчилар фикрича, бошқа кўплаб ҳолатларда аёл эрларини қандли диабетга қарши дорилар ва жинсий фаолиятни яхшиловчи воситалар аралашмаси билан аста-секин заҳарлаган. Баъзида бундай препаратларга техник спирт ҳам қўшган. Воқеалардан бирида у эркакни дори-дармонлар ёрдамида заифлаштирганидан сўнг, нам сочиқ билан бўғиб ўлдирган.
Акбарийнинг барча қурбонлари кекса бўлгани учун уларнинг ўлими ҳеч кимда шубҳа уйғотмаган. Бунинг устига, аёл ўлимларига қадар уларга ғамхўрлик қилган ва аҳволи оғирлашганда касалхонага олиб борган. Бироқ эркаклар касалхонадан чиқарилгандан сўнг ҳам, аёл уларга заҳар беришни давом эттирган.
Маълумот ўрнида, Ҳиндистонда етти ой ичида 25 нафар эркакка турмушга чиққан фирибгар келин ушланган эди. Анурадҳа Пасван исмли бу аёл “Қочқин келин” лақабини олган бўлиб, у бир нечта шахслардан иборат жиноий гуруҳининг аъзоси бўлган. Келиннинг ҳаёти одатда қуйидагича ўтган: у ишонувчан ва ҳеч нарсадан бехабар эркакларга турмушга чиқиб, бир неча кундан сўнг уларнинг пуллари, қимматбаҳо тақинчоқлари ва электрон буюмлари ўғирлаб, ғойиб бўлган.
Изоҳ (0)