Непал тоғ туризмини ривожлантириш мақсадида 97 та Ҳимолай чўққисини кейинги 2 йил давомида бепул забт этишга рухсат беради. Бу ҳақда BBC хабар берди.
Маълум қилинишича, тўлов бекор қилинадиган чўққилар Непалнинг Карнали ва Судурпасчим провинцияларида жойлашган бўлиб, уларнинг баландлиги 5970 метрдан 7132 метргача. Бу ҳудудлар мамлакатнинг ғарбий қисмида жойлашган бўлиб, улар энг камбағал ҳамда кам ривожланган провинциялар сирасига киради.
Бу қарордан олдинроқ Эверест чўққисига чиқиш учун рухсатнома нархи сентябрдан бошлаб оширилиши эълон қилинган эди. Унга кўра, алпинистик мавсумида (апрель–май) дунёнинг энг баланд чўққисига чиқиш учун тўлов 15 минг долларга етади.
Непал туризм департаменти 97 та чўққига бепул чиқиш ташаббуси мамлакатнинг ҳали кашф этилмаган туристик масканларини оммалаштиришга хизмат қилишига умид билдирмоқда. Маълумот ўрнида, алпинизм мамлакатда муҳим даромад манбаси саналади — Непал дунёдаги энг баланд 10 тоғнинг барчасига эгалик қилади. Биргина тоғга чиқиш рухсатномаларининг ўзидан 2024 йили 5,9 миллион доллар даромад олинган. Бунинг 3/3 қисми Эверест ҳиссасига тўғри келади.
“Гўзаллиги ҳайратланарли бўлса-да, Карнали ва Судурпасчим провинцияларига турист ва алпинистлар жуда кам боради, чунки ҳудудга кириш жуда қийин. Янги тартиб бу ҳолатни ўзгартиришига умид қиламиз. Бу ўз навбатида янги иш ўринлари яратади, даромад келтиради ва маҳаллий иқтисодиётни мустаҳкамлайди”, деди Непал Туризм департаменти директори Ҳимал Гаутам.
Бироқ расмийлар ушбу ҳудудларда инфратузилма ва транспорт имкониятларини яхшилаш бўйича режа тузганми ёки йўқ — ҳозирча номаълум. Ушбу чўққига бепул чиқиш ташаббуси амалиётга татбиқ этилса, маҳаллий аҳоли катта оқимдаги сайёҳларни қабул қила оладими? Бу масала ҳам савол остида.
Таъкидланишича, сўнгги 2 йилда юқорида таъкидланаётган 97 та чўққидан фақат 68 тасига алпинистлар қадам қўйган. Эверестга чиқиш учун эса 2024 йилнинг ўзида 421 та рухсатнома берилган. 8849 метр баландликдаги Эверест чўққиси сўнгги йилларда ортиқча гавжумлик, экологик муаммолар ва бир қатор фожеали воқеалар билан боғлиқ муаммоларга дуч келмоқда. Непал Олий суди 2024 йилнинг апрель ойида ҳукуматга Эверест ва бошқа йирик чўққиларга бериладиган рухсатномалар сонини чеклашни буюриб, “тоғларнинг қабул қила олиш имконияти ҳурмат қилиниши керак”лигини таъкидлаган.
Маълумот учун, Непал парламентида кўриб чиқилаётган янги қонун лойиҳасига кўра, Эверестга чиқишни истаган ҳар бир алпинист аввал мамлакатдаги баландлиги 7 минг метрдан ошган тоғ чўққисини забт этган бўлиши лозим. Шу боис Карнали ва Судурпасчимдаги бепул чўққилар “идеал тайёргарлик макони” сифатида эътироф этилмоқда.
Изоҳ (0)