Президент Шавкат Мирзиёев Туркиянинг Истанбул шаҳрида бўлиб ўтаётган Туркий тилли давлатлар ҳамкорлик кенгашининг навбатдаги саммитида кенгашга аъзо давлатлар ҳамкорлиги борасида бир қатор таклифларни илгари сурди. Бу ҳақда Президент матбуот котиби Шерзод Асадов хабар қилди.
Қайд этилишича, Шавкат Мирзиёев Туркий кенгаш давлатларининг ҳамкорлик борасида ҳали ишга солинмаган улкан имкониятларидан тўлақонли фойдаланишга чақирган. Жумладан:
- ташкилот доирасида савдо алоқаларини кенгайтириш учун қулай ва жозибадор шароитларни яратиш;
- учинчи давлатлардан кириб келаётган маҳсулотларни ташкилотга аъзо мамлакатларда ишлаб чиқариш мумкин бўлган товарлар ҳисобидан қоплаш;
- туркий давлатлар савдо ҳамкорлиги бўйича тадқиқот марказини ташкил этиш;
- туркий давлатлар ташкилотининг транспорт соҳасидаги ўзаро боғлиқ дастурини ишлаб чиқиш;
- аъзо давлатлардаги ихтисослашган ташкилотлар негизида «Инжиниринг ва технологиялар марказлари»ни ташкил этиш;
- келгуси йили Ўзбекистонда Туркий давлатлар саноат ҳафталигини ўтказиш.
Шунингдек, Президент 12 ноябрь куни Истанбулда Қирғизистон президенти Садир Жапаров билан ҳар икки давлат ўртасидаги келишувларни амалга ошириш масалаларини муҳокама қилди. Мулоқотда Хитой—Қирғизистон—Ўзбекистон темир йўлини қуриш лойиҳасини жадал илгари суришга алоҳида эътибор қаратилди.
Бундан ташқари, бугун саммит доирасида Туркий кенгаш котибиятининг янги биноси олдида байроқ кўтариш маросими бўлиб ўтди. Унда Ўзбекистон, Озарбайжон, Туркия, Қирғизистон, Қозоғистон, Венгрия, Туркманистон ва ташкилотнинг байроқлари кўтарилди.
Изоҳ (0)