Ўзбекистон Президенти Шавкат Мирзиёев 12 ноябрь куни кечаси Туркия президенти Ражаб Тоййиб Эрдўғон билан учрашди.
Шавкат Мирзиёев Туркия етакчисини Туркий давлатлар ташкилотининг тарихий саммити муваффақиятли ўтказилгани ва ушбу нуфузли минтақавий тузилмага раисликни қабул қилиб олгани билан яна бир бор табриклади.
Президентлар Ўзбекистон–Туркия стратегик шериклик ва кўп қиррали ҳамкорлик муносабатларини янада мустаҳкамлашнинг долзарб масалаларини кўриб чиқди.
Савдо-иқтисодий ва инвестициявий ҳамкорликдаги бугунги юқори суръатларни сақлаб қолиш, товар айирбошлашни кўпайтириш, икки мамлакат етакчи корхона, компания ва банклари кооперациясини кучайтириш муҳим экани таъкидланди.
Гуманитар алоқалар фаоллашгани, Ўзбекистон ва Туркияда маданий тадбирлар мунтазам ўтказилаётгани мамнуният билан қайд этилди.
Минтақа кун тартибидаги масалалар юзасидан ҳам фикр алмашилди.
Мавзуга доир: «Афғонистонни террорчилар маконига айланишига йўл қўймаслик ниҳоятда долзарбдир» — Шавкат Мирзиёев
Шунингдек, Президент 12 ноябрь куни Истанбулда Қирғизистон президенти Садир Жапаров билан ҳар икки давлат ўртасидаги келишувларни амалга ошириш масалаларини муҳокама қилди. Мулоқотда Хитой—Қирғизистон—Ўзбекистон темир йўлини қуриш лойиҳасини жадал илгари суришга алоҳида эътибор қаратилди.
Бундан ташқари, бугун саммит доирасида Туркий кенгаш котибиятининг янги биноси олдида байроқ кўтариш маросими бўлиб ўтди. Унда Ўзбекистон, Озарбайжон, Туркия, Қирғизистон, Қозоғистон ҳамда Венгрия, Туркманистон ва ташкилотнинг байроқлари кўтарилди.
Саммит доирасида Ўзбекистонда 2022 йилда Туркий давлатлар саноат ҳафталиги ўтказилиши ҳамда Туркий давлатлар ташкилотининг биринчи саммити 2022 йилда Ўзбекистонда бўлиб ўтиши эълон қилинди.
Изоҳ (0)