Шавкат Мирзиёев 11 октябрь куни Ашхобод шаҳрида туркман шоири ва мутафаккири Махтумқули Фироғий таваллудининг 300 йиллигига бағишланган “Замон ва цивилизацияларнинг ўзаро боғлиқлиги - тинчлик ва тараққиёт асоси” мавзусидаги халқаро форумда иштирок этди.
Президент матбуот хизматининг маълум қилишича, Туркманистон президенти Сердар Бердимуҳамедов раислигида ўтган тадбирда Россия президенти Владимир Путин, Қозоғистон президенти Қосим-Жўмарт Тўқаев, Қирғизистон президенти Садир Жапаров, Тожикистон президенти Эмомали Раҳмон, Эрон президенти Масъуд Пезешкиён, Покистон президенти Осиф Али Зардарий, Монголия президенти Ухнаагийн Хурельсух, Арманистон президенти Ваагн Хачатурян, хорижий давлатлар парламентлари раҳбарлари ва юқори мартабали вакиллари, халқаро ва минтақавий ташкилотлар раҳбарлари иштирок этди.
Давлат раҳбари ўз нутқида форумнинг ўтказилиши халқларимиз ўртасидаги биродарлик ва ҳамжиҳатлик ришталарини мустаҳкамлаш, мамлакатларимизни бир-бирига янада яқинлаштириш, бой маънавий меросимизни бутун дунёга тарғиб қилиш йўлида улкан амалий қадам бўлишини таъкидлади.
2024 йилда Ўзбекистонда Махтумқули Фироғий таваллудининг 300 йиллиги кенг нишонланаётгани таъкидланди. Анжуман, семинар, адабий кеча, танлов, спектакллар ва бошқа тадбирлар ўтказилмоқда. Ўзбек ва туркман киноижодкорлари томонидан шоир ҳақида ҳамкорликда бадиий фильм суратга олинди.
Ўзбекистон етакчиси Туркманистон ташаббуси билан БМТ бош ассамблеяси томонидан эълон қилинган "Халқаро тинчлик ва ишонч йили" доирасида келгуси йили Ашхобод шаҳрида глобал саммит ўтказилишини қўллаб-қувватлади.
Туркманистон президенти Сердар Бердимуҳамедов Ўзбекистон президентига мазмунли нутқ ҳамда Махтумқули Фироғий хотирасини абадийлаштириш борасида юртимизда амалга оширилаётган чора-тадбирлар учун миннатдорлик билдириб, туркман шоири ва мутафаккири таваллудининг 300 йиллиги муносабати билан Шавкат Мирзиёевни медал билан мукофотлаш тўғрисидаги қарор қабул қилинганини маълум қилди.
Тадбир ниҳоясида форумнинг якуний ҳужжати қабул қилинди
Шавкат Мирзиёев 2024 йилнинг февралида “Буюк туркман шоири ва мутафаккири Махтумқули Фироғий таваллудининг 300 йиллигини кенг нишонлаш тўғрисида”ги қарорни имзолаганди. Туркманистон Халқ маслаҳати раиси Гурбангули Бердимуҳамедов ушбу қарор учун миннатдорчилик мактуби йўллаганди.
Қарорга кўра, Махтумқули Фироғий таваллудининг 300 йиллигини мамлакатда кенг нишонланади. Махтумқули Фироғийнинг “Танланган асарлар”и ҳамда унинг ҳаёти ва ижодий фаолиятига бағишланган илмий мақолалар тўплами нашрга тайёрланади ва чоп этилади. Шунингдек, давлат буюртмаси асосида Ўзбекистон ва Туркманистон кино усталари ҳамкорлигида Махтумқули Фироғийга бағишланган бадиий фильм яратилади.
Шу билан бирга, “Махтумқули ижодининг ўзбек адабиёти ва санъатида тутган ўрни” мавзусида халқаро илмий конференция ўтказилади.
Изоҳ (0)