Украина узоқ вақтдан бери Россиянинг Эрон ишлаб чиқарган Shahed-136 камикадзе дронларини тутиб олиш қобилиятига эга дрон ишлаб чиқмоқда. The Telegraph мазкур дрон ҳақида маълумот берди.
Маълум қилинишича, бу Sting деб номланувчи бошқариладиган учувчисиз аппарат ҳисобланади. У Shahed’ларни тутиб олувчи зенит ракетлари ўрнига арзонроқ вариант бўлиши кутилмоқда. Дрон соатига 160 километрдан ортиқ тезликда парвоз қилиши ва тахминан 3 километр баландликка кўтарила олиши мумкин.
“Sting - марказидан юқорига кўтарилган катта гумбазли, жанговар каллак ва камера ўрнатилган квадрокоптернинг классик конструкциясидир. У ердан VR кўзойнаклари ёрдамида бошқарилади, бу эса операторга учув йўналишини аниқ кўриш имконини беради. Келажакдаги ишланма учувчига душман нишонларини мўлжалга олиш имконини берадиган сунъий интеллектли нишонга олиш тизимига эга бўлади”, деб ёзади The Telegraph.
Украина армияси Россиянинг “Зала” ва “Орлан” типидаги разведка дронларини кичик FPV-дронлари ёрдамида муваффақиятли йўқ қилган бўлса-да, эндиликда Sting Shahed-136 билан курашишга мўлжалланган биринчи махсус дрон бўлади.
Таъкидланишича, Россия ҳар суткада 30 тадан 80 тагача Shahed дронларини ишлаб чиқаради ва бу Украина ҳаво мудофааси учун муаммо бўлмоқда.
Изоҳ (0)