9 март куни Украина қуролли кучлари Россия томонидан учирилган 15 та Shahed дронларидан 12 тасини уриб туширган. Бу ҳақда Тhe Kyiv Independent нашри маълум қилди.
Хабарда айтилишича, Украина ҳаво ҳужумидан мудофаа воситалари Днепропетровск, Донецк ва Полтава вилоятлари осмонида Россия ҳарбий дронларини уриб туширган. Қаттиқ қаршиликка қарамай, рус дронлари Днепропетровск вилоятининг Кривой Рог шаҳри яқинида қатор объектларга ҳужум қилиб, портлашлар ташкил этишга эришган.
Ҳарбий маъмурият фуқаролар орасида ҳужумдан шикастланиш ҳолатлари рўй бергани ҳақида маълум қилган. Жумладан, Донецк вилояти ҳудудида 4 нафар фуқаро жиддий жароҳат билан касалхоналарга ётқизилган. Рус қўшинлари Пивденне қишлоғини ўққа тутиши натижасида 23 ёшли йигит оғир жароҳат билан тез ёрдам бўлимига олиб кетилган. Сиверск шаҳрида ҳарбий дрон фуқаролик автомобилига келиб урилиши оқибатида икки фуқаро оғир тан жароҳати олган.
Россия ҳарбий идоралари 9 март куни Россиянинг Курск ва Ростов вилоятларига ҳужум қилинганини тасдиқлаган. Шунингдек, Россия нашрлари 40 дан зиёд Украина дронлари рус учоқлари томонидан тутиб олинганини хабар берган. Аммо ушбу хабарлар ҳали расман тасдиқланмаган.
Манбага кўра, ҳозирда Россия дрон ҳужумларининг асосий нишонлари Белгород, Брянск, Орел ва Ленинград вилоятларидаги нуқталар билан чекланмоқда.
Изоҳ (0)