Россия ва Хитой компаниялари Россия Украина билан урушда фойдаланаётган Эрон Shahed’ларига ўхшаш хусусиятларга эга ҳужумчи дронни биргаликда ишлаб чиқишни бошлади, дея Bloomberg хабар берди.
Нашр манбаларига кўра, ҳамкорлик бўйича музокаралар 2023 йилда бўлиб ўтган, 2024 йилда эса Россияга дронлар жўнатишга тайёргарлик доирасида ишлаб чиқиш ва синовдан ўтказиш ишлари бошланган.
Манбалар дрон модели номини очиқламаган, бироқ Хитой мудофаа веб-сайтлари ва оммавий ахборот воситалари мамлакатда Sunflower 200 номли ҳужумчи дронлар ишлаб чиқилаётгани ҳақида хабар берган, бу эса тавсифи жиҳатидан Эроннинг Shahed 136 самолётига ўхшашлиги айтилмоқда.
Bloomberg манбаларидан бири, АҚШнинг ҳисоб-китобларига кўра, Хитой Россияга тўлиқ қурилган дронларни жўнатиш ёки жўнатмаслик ҳақида ўйламоқда, аммо айни пайтда уларни йиғиш учун компонентлар юбормоқда. Нашр суҳбатдошларининг таъкидлашича, Хитой Shahed каби дронларни Эрон ёки Россияга қараганда тезроқ ишлаб чиқариши мумкин – ва бу факт хавотирга сабаб бўлади.
Хитойнинг АҚШдаги элчихонаси матбуот котиби Лю Пенюйнинг айтишича, Хитой Украина можаросида иштирок этаётган томонларга қурол етказиб бермаяпти ва икки мақсадли маҳсулотлар экспортини қаттиқ назорат қилади.
Россия президентининг матбуот котиби Дмитрий Песков Хитой билан барча соҳаларда ҳамкорликни тасдиқлаган.
Биз Хитой билан савдо-иқтисодий алоқаларни ривожлантирдик, Хитой билан жуда катта ҳажмдаги савдо айланмасига эгамиз, — дейди Песков.
Россия армияси 2022 йилдан бери Украинага қарши Эронда ишлаб чиқилган Shahed-131/136 камикадзе ҳужумчи дронларидан фойдаланмоқда. Тhе Washington Post нашрининг ёзишича, Россия 2025 йилнинг ёзигача олти мингта шундай дрон ишлаб чиқаришни режалаштирган.
Қўшма Штатлар ва унинг иттифоқчилари Украинадаги уруш бўйича бетараф позицияни эгаллаган Пекинни Россияга тўғридан тўғри қурол ёки ўқ-дорилар етказиб беришга йўл қўйилмаслиги ҳақида бир неча бор огоҳлантирган.
2024 йил апрелида Оқ уй Хитой компанияларига, агар улар Москвага Россия мудофаа саноати ривожланишини қўллаб-қувватловчи бутловчи қисмлар ёки икки томонлама мақсадли маҳсулотлар етказиб беришда давом этса, санкциялар билан таҳдид қилган эди.
Изоҳ (0)