Россия қўшинлари 3 ноябрга ўтар кечаси Shahed типидаги камикадзе дронлари билан Украинага кенг кўламли ҳужум уюштирди. Украина Қуролли кучлари Бош штабининг эрталабки ҳисоботида айтилишича, Украина ҳудуди бўйлаб 38 та дрон учирилган, улардан 24 таси уриб туширилган.
Украина Қуролли кучлари шунингдек, Россиянинг Х-59 ракетасини уриб туширганини маълум қилди. Бош штаб дрон ҳужуми оқибатлари ҳақида ҳозирча хабар бермади.
Харьков вилояти полицияси Россиянинг ўнта учувчисиз учоғи минтақадаги фуқаролик инфратузилмасига ҳужум қилганини маълум қилди. Дастлабки маълумотларга кўра, қурбонлар йўқ. Дрон зарбалари оқибатида гаражлар ва автомашиналар ёниб кетган, хўжалик иншоотлари шикастланган.
Полициянинг маълум қилишича, дронлардан бири таълим муассасасига урилган. Бино ёниб кетган, икки қават ва том вайрон бўлган. Ёнғинлар турар жой биноси ва маъмурият биносида ҳам содир бўлган. Барча ёнғинлар ўчирилди, дея қўшимча қилди полиция.
.jpg)
.jpg)
Лвов вилояти расмийлари ҳам дрон ҳужуми ҳақида хабар берди. Львов вилояти маъмурияти раиси Максим Козицкий тунда ҳаво ҳужумидан мудофаа ишга тушгани ҳақида ёзди. У ҳужум оқибатлари ҳақида хабар бермади.
Украина Қуролли кучларининг “Жануб” оператив қўмондонлиги матбуот котиби Наталя Гуменюк телемарафонда ҳаво ҳужумидан мудофаа тизимлари қарийб беш соат ишлаганини айтди.
“Жанубда Shahed типидаги 11 та дрон устида иш олиб борилди ва бир кечада йўқ қилинди: Николаев вилояти ва Кировоград вилоятида учтадан, Одесса вилоятида иккитадан ва Херсон вилояти, Днепропетровск вилояти ва Винница вилоятида биттадан. Х-59 ракетаси ҳам Кировоград вилоятида уриб туширилди”,— дея унинг сўзларидан иқтибос келтиради “Украинскай правда”.
Гуменюкнинг қўшимча қилишича, Одесса вилоятидаги инфратузилма объекти техник ҳудудига зарба келиб тушган. Унинг сўзларига кўра, қурбонлар йўқ, етказилган зарар ҳам жиддий эмас.
Изоҳ (0)