Россия Покистон, Миср, Беларусь ва Бразилия каби давлатларга экспорт қилган қуролларининг бир қисмини қайтариб олишга уринмоқда. Бу ҳақда The Wall Street Journal ўз манбаларига таяниб хабар берди.
Қайд этилишича, 2022 йилнинг апрелида Қоҳирага ташриф буюрган россиялик амалдорлар Миср президенти Абдулфаттоҳ ас-Сисидан Россия вертолётларига ўрнатилган 100 дан ортиқ двигателларни қайтаришни сўраган.
Сиси бунга рози бўлган ва 150 га яқин двигателларни қайтариш кейинги ойдан бошланиши айтилмоқда.
“Ушбу музокаралар Россиянинг ўзининг эски мижозларига ёрдам сўраб мурожаат қилишга уринишининг бир қисми ҳисобланади, улар ўнлаб йиллар давомида русларнинг самолойлари, ракеталари ва ҳаво ҳужумидан мудофаа тизимларини сотиб олиб келган, натижада Москва дунёда қурол экспорт қилиш бўйича иккинчи ўринга кўтарилган.
Йил давомида Россия Покистон, Беларусь ва Бразилиянинг расмий шахслари билан музокаралар олиб бориб, ҳужум қилишга мўлжалланган ва транспорт вертолётлари учун двигателларни қайтариб олишга уринган”, — дейилади хабарда.
Бундан ташқари, уруш туфайли Россия ўзининг фойдали қурол экспорти “бизнес”нинг бир қисмини қурбон қилган. Хусусан, Ҳиндистон ва Арманистон учун мўлжалланган қуроллар Украина билан кечаётган уруш фронтига йўналтирилмоқда.
“Москванинг қуролларни қайта сотиб олишга бўлган уринишининг аксарият қисми украин қўшинларининг мамлакат шарқи ва жанубига уюштирган ҳужумларини қайтариш вақтига тўғри келади. Ҳозирда мазкур ҳужум сусайган пайтда Россия жанг майдонида ташаббусни қўлга олмоқчи”, — дея таъкидланади хабарда.
Эслатиб ўтамиз, Россия қўшинлари 3 ноябрга ўтар кечаси Shahed типидаги камикадзе дронлари билан Украинага кенг кўламли ҳужум уюштирди. Украина Қуролли кучлари Бош штабининг эрталабки ҳисоботида айтилишича, Украина ҳудуди бўйлаб 38 та дрон учирилган, улардан 24 таси уриб туширилган.
Изоҳ (0)