29 декабрга ўтар кечаси Россия қўшинлари учувчисиз учоқлар ва қанотли ракеталар ёрдамида Украинага йирик ҳужум уюштирди, деб хабар берди Украина Қуролли кучлари Ҳарбий-ҳаво кучлари.
Харьковга Х-22 товушдан тез учадиган қанотли ракеталар ва S-300 комплексидан учирилган ракеталар билан ҳужум қилинди, деди шаҳар раҳбари Игор Терехов. Унинг сўзларига кўра, тунда ва эрталаб шаҳарда камида 12 та зарба қайд этилган. Харьковдаги отишмалар туфайли транспорт учун электр энергиясини етказиб беришда муаммолар юзага келди. Ҳужум туфайли шаҳарда шифохона биносига зарар етган, деди вилоят полицияси раҳбари Владимир Тимошко. Дастлабки маълумотларга кўра, ҳеч ким жабрланмаган.
Львовда, шаҳар мери Андрей Садовийнинг сўзларига кўра, муҳим инфратузилма объектида учувчисиз учоқ ҳужуми оқибатида ёнғин чиққан. Унга кўра, умумий ҳисобда Львов вилоятига 10 дан ортиқ Shahed ҳужумчи дронлари ҳужум қилган. Бир киши ҳалок бўлган, уч киши яраланган.
Одессада уриб туширилган дрон қолдиқлари кўп қаватли уйга қулаб, ёнғин бошланди, деди вилоят маъмурияти раҳбари Олег Кипер. Украина фавқулодда вазиятлар давлат хизмати ҳеч ким жабрланмагани, ёнғин ўчирилгани ҳақида хабар берди.
Суми вилоятида рус қўшинлари Конотоп шаҳрига ракета ҳужуми уюштирган. Уч киши жароҳатланган. Турар жой биноси ва автомобилларга техник хизмат кўрсатиш шохобчаси шикастланган. Отишма туфайли машина ёниб кетган.
Айни пайтда бутун Украина бўйлаб ҳаво ҳужумидан огоҳлантириш эълон қилинган. “Суспильна” мухбирларининг хабар беришича, Запорожье ва Днепрда портлашлар эшитилмоқда. Днепрдаги савдо маркази ёниб кетган.
Украина ҳарбий-ҳаво кучлари Киев аҳолисини ертўлаларга тушишга чақирди. Шаҳарда портлаш овозлари эшитилмоқда, расмийларга кўра, ҳаво ҳужумидан мудофаа ишлари олиб борилмоқда. Дастлабки маълумотларга кўра, ракета парчалари Киевнинг Святошинский туманига тушган.
Подольск туманида омбор ёниб кетди, деди Киев мэри Виталий Кличко.
Изоҳ (0)