Нигериянинг Замфара штатида қуролланган шахслар томонидан 50 дан ортиқ одам ўғирлаб кетилди. Бу ҳақда БМТ маълумотларига таяниб, The Guardian хабар берди.
Таъкидланишича, 1 август куни Замфара штатининг Сабон Гарин Дамри қишлоғига қуролли шахслар ҳужум қилган. Уларнинг катта миқдорда товон ундириш мақсадида бу ишга қўл ургани тахмин қилинмоқда. Штат полицияси ушбу ҳолат бўйича ҳали изоҳ бермаган.
Нигерияда қуролли саҳхслар тажовузи дастлаб чорвадор ва деҳқонлар ўртасидаги сув ва ер ресурслари талашуви фонида бошланган бўлса-да, бугунга келиб бу муаммо кенг кўламли уюшган жиноятчилик даражасига етган. Айниқса, давлат назорати заиф бўлган қишлоқ ҳудудларидаги аҳоли доимий таҳдид остида қолмоқда.
Мутахассислар фикрича, Замфара штатида оммавий одам ўғирлаш ҳолатларининг кўпаяётгани ушбу жиноятчиларнинг стратегиясида жиддий ўзгариш юз берганини англатади. Июль ойида ҳам худди шу каби ҳодиса юз берган. Ўшанда гаровдагиларнинг оила аъзолари жиноятчиларга 33 700 АҚШ доллари миқдорида товон ҳам тўлаган. Шунга қарамай, февраль ойида гаровга олинган 33 киши ўлдирилгани маълум қилинган. Уларнинг орасида 3 нафар гўдак ҳам асирликда ҳалок бўлган.
2011 йилдан буён, минтақада қурол савдоси кучайиб, Саҳел ҳудудида беқарорлик кучайгани ортидан Нигериянинг шимоли-ғарбида қуролли гуруҳлар фаолияти авж олган. Бу гуруҳлар чорва моллари ва одам ўғирлаш ҳамда ноқонуний солиқ йиғиш орқали катта даромад топмоқда.
Сўнгги йилларда бу зўравонликлар шимоли-ғарбдан шимолий-марказий ҳудудларга ҳам тарқалмоқда. Икки ҳафта олдин Нигер штатида ўтказилган ҳарбий амалиёт давомида ҳукумат армияси 95 нафар қуролланган шахсни йўқ қилганди. Бироқ ҳарбийлар ресурс етишмовчилиги ва ортиқча юклама остида ишлашга мажбур бўлмоқда.
Молиявий манфаат излаётган қуролли шахслар эндиликда Нигериянинг шимоли-шарқида 16 йилдан бери фаолият юритаётган экстремистик гуруҳлар билан ҳам ҳамкорлик қилмоқда. Жумладан, сўнгги ойларда мамлакатнинг шимоли-ғарбий ҳудудларда “Лакурава” номли янги гуруҳнинг пайдо бўлиши вазиятни янада оғирлаштирган.
Изоҳ (0)