25 ноябрга ўтар кечаси Россия қўшинлари Shahed типидаги камикадзе-дронлар ёрдамида Украинага йирик ҳужум уюштирди, деб хабар бермоқда “Украинская правда” мамлакат Қуролли кучлари ҳаво кучларига таяниб.
Киев шаҳри ва вилоятида ҳаво ҳужумидан мудофаа тизимлари ишга тушди. Украина пойтахтида дрон қолдиқлари Соломенский, Днепровский ва Голосеевский туманларидаги бинолар ва турар жойлар устига қулади, деди шаҳар мери Виталий Кличко.
Соломенский туманида дрон қолдиқларининг қулаши оқибатида бир нечта жойда — болалар боғчаси, турар жой биноси, нотурар жой ва очиқ жойларда ёнғинлар содир бўлди. Дронлардан бирининг қолдиқлари беш қаватли бинонинг иккинчи қаватига тушиб, у ерда икки нафар тинч аҳолинининг чиқиш йўлини тўсиб қўйди.
Ҳужум оқибатида 11 ёшли бола жароҳат олди, деди Кличко. Кейинроқ мер Соломенский туманида икки киши жабрланганига аниқлик киритди.
Киевда жами 40 дан ортиқ дрон уриб туширилди, деб хабар бермоқда “РБК-Украина” шаҳар ҳарбий маъмурияти спикери Михаил Шамановга таяниб. Унинг сўзларига кўра, бу Киевда сўнгги ойдаги энг катта кўламдаги ҳужум бўлди.
Украина Қуролли кучлари Ҳарбий ҳаво кучлари қўмондонлиги Россия қўшинлари Украина бўйлаб рекорд миқдордаги дронларни учиргани, Киев ҳужумнинг асосий йўналишига айланганини таъкидлади.
Тунда Украина ҳарбийлари Днепропетровск вилояти узра бешта учувчисиз учоқ ва бир ракетани ҳам уриб туширган. Шунингдек, Николаев вилоятида яна бир дрон уриб туширилган.
Изоҳ (0)