АҚШ президенти Жо Байден Германияга ташрифи якунлари бўйича Ғарб иттифоқчилари Украинанинг Россия ҳудудига ҳужум қилиш учун узоқ масофали қуроллардан фойдаланиши масаласида ҳалигача якдил фикрга эриша олмаганини айтди, деб ёзади Bloomberg.
16 октябрь куни Оқ уй матбуот котиби Карин Жан-Пьер АҚШ Россия ҳудудига узоқ масофали зарбалар бериш учун Америка қуролларидан фойдаланишни Украинага тақиқлаганини айтганди.
Аввалроқ Британиянинг LBC радиостанцияси манбаларга таяниб, Байден маъмурияти Украинанинг узоқ масофага учувчи қуроллардан фойдаланишга оид сиёсатини ўзгартириш вице-президент Камала Харриснинг сайловолди кампаниясига зарар етказишидан қўрқишини хабар қилганди. Радиостанцияга кўра, Қўшма Штатлар ва Буюк Британия охир-оқибат Киевнинг Россияга зарба бериш учун узоқ масофали қуроллардан фойдаланишини маъқуллаши мумкин, аммо улар буни “яширин” қилишади ва “биринчи ракеталар учирилгандан” кейин қарорни расман эълон қилишади.
Байден аввалроқ Украина учун узоқ масофали қуроллардан фойдаланиш бўйича чекловларни бекор қилиш масаласи кўриб чиқилаётганини маълум қилган эди. АҚШ давлат котиби Энтони Блинкен Sky News телеканалига берган интервьюсида АҚШ президенти Украинага Россия ҳудудига ракета зарбалари беришга рухсат бериши мумкинлигини айтди.
Россия президенти матбуот котиби Дмитрий Песков аввалроқ Кремль Қўшма Штатлар Россия ҳудудига зарба бериш учун ATACMS ракеталарини қўллашга қўйилган чекловларни бекор қилишга қарор қилган, деган тахминни илгари сурганди. Песков Вашингтонга бундай қарорга муносиб жавоб беришга ваъда берди.
Изоҳ (0)