Россиялик депутат Сергей Миронов Ўзбекистоннинг Қозон шаҳридаги Бош консуллиги фуқароларни Россия армиясида хизмат қилмасликка чақирганидан сўнг, Ўзбекистон билан виза режимини жорий қилиш кераклигини айтганди. Ўзбекистон жамоатчилиги бунга муносабат билдирди.
Дастлаб “Миллий тикланиш” демократик партияси раиси Алишер Қодиров унга жавоб қайтарди.
“Ўзбеклардек баракали халқ ҳаққини меҳнат қилиб топади, одам ўлдириб эмас”, деб айтди депутат.
Россияни эса Мироновнинг ўзи, ўғиллари, куёвлари ва неваралари ҳимоя қилиши кераклигини таъкидлади. “Билишимча, руслар ҳам Ватанни ҳимоя қилишни ўзбеклардагидек муқаддас бурч ҳисоблайдилар”, деди Алишер Қодиров.
Олий Мажлис депутати, “Юксалиш” ҳаракати раиси Бобур Бекмуродов консуллик фуқароларни Ўзбекистонда ноқонуний ҳисобланган ҳаракатлардан ҳимоя қилишини табиий ва адолатли, деб атади ва бундай тажовузкор риторика фақат икки томонлама муносабатларга салбий таъсир кўрсатишини қайд этди.
“Ватандошларимиз ўз меҳнатлари билан Россиянинг иқтисодиётига ҳисса қўшяпти. Ижтимоий нафақаларни инсон ҳаётига таҳдид қилувчи ҳаракат билан солиштириш саводсизлик ва аҳмоқликдир”, дейди Бобур Бекмуродов.
Депутат Ўзбекистон билан Россия ўртасидаги “Иттифоқчилик муносабатлари тўғрисида”ги шартноманинг 7-моддасида “...бир томон фуқаролари ва юридик шахсларининг қонуний ҳуқуқлари ва манфаатларини бошқа томон ҳудудида кафолатлайдиган самарали чоралар кўрадилар”, деб ёзилганини эслатди.
“Бизда қонунлар ишлайди. Сизларда ҳам шундай бўлиши керак, ўртоқ Миронов”, деди Бобур Бекмуродов.
Ҳолатга экология вазири маслаҳатчиси, жамоатчилик фаоли Расул Кушербаев ҳам муносабат билдирди.
“Ўзбекистон дипломатик идораси Ўзбекистон қонунчилигида кўзда тутилган нормаларни ўз фуқароларига эслатгани учун Россиядан виза режими жорий этиш таҳдиди янграётгани, Россия сиёсатчилари Ўзбекистонни ўзларига қарам давлат сифатида кўришини англатмоқда.
Афсуски, юқори мартабали сиёсатчининг бу гаплари Россия томони Ўзбекистон билан алоқаларни бузиш учун баҳона қидираётганини кўрсатмоқда”, деди у.
“Ўзбекистон ўз ҳудудида ишлаётган рус фуқароларини Ўзбекистон манфаати учун қаергадир урушга жўнатганида Россия дипломатик ваколатхоналари индамай туришармиди?”, дея савол берди Кушербаев. Шунингдек, у Ўзбекистонда ҳам қарши томонга нисбатан худди шундай виза режими жорий этиш имконияти борлигини унутмаслик кераклигини қайд этди.
“Менимча Ўзбекистон учун номақбул шахслар рўйхатига Захаровадан сўнг ким киритилиши кераклиги кўпчиликка тушунарли бўлган бўлса керак”, дея қўшимча қилди Кушербаев.
Изоҳ (0)