Telegram Украина разведкасининг расмий ботларини блоклаб қўйди

Telegram’да Украина мудофаа кучларини разведка маълумотлари билан таъминловчи расмий ботлар блоклаб қўйилди. Украина разведкаси бунга муносабат билдирди.

Блокланган ботларнинг барчаси Россия ҳарбийларининг ҳаракати тўғрисидаги маълумотларни узатиш ёки босиб олинган ҳудудларда қаршилик ҳаракатининг координацияси билан боғлиқ бўлган. Украина бош разведка бошқармаси фуқароларни ўхшаш номдаги ботларга маълумотларни юборишдан огоҳлантирган.

“Украина разведкасининг боти бошқа платформаларда ишлаши қайта тикланган, украинларнинг шахсий маълумотлари хавфсиз. Telegram платформаси раҳбарияти Россиянинг Украинага нисбатан ҳарбий агрессиясига қарши курашган бир қатор расмий ботларни, жумладан “Асосий разведка боти”ни асоссиз равишда блоклади. Бу Telegram раҳбарияти оммага эълон қилган қоидалар ва баёнотларга зид равишда содир бўлди”, — деб хабар беради разведка матбуот хизмати.

Ҳозирда қуйидаги ботлар ишламаяпти:

• ”эВраг” (Рақамли ривожланиш вазирлигининг расмий боти, @evorog_bot);
• Украина бош разведкаси ва хавфсизлик хизматининг расмий ботлари (Intelligence Bot ва Stop Russian War);
• Украина жанубидан бот координатори;
• Shahed дронларини кузатиш учун ҳаво ҳужумидан мудофаа тизими боти.

“Руслар украиналикларнинг маълумотларини қабул қилиш учун сохта ботларни яратди”, — дейилади хабарда.

Маълум қилинишича, баъзи рус ботлари ҳам ишламаяпти.