Россиянинг яқинда Украина энергетика инфратузилмасига уюштирган зарбалари натижасида мамлакатда айни дамда жиддий энергетика инқирози ва аҳолининг электр таъминотида узилишлар кузатилмоқда. Бу ҳақда “Укрэнерго” раҳбари Владимир Кудрицкий маълум қилган.
“2022—2023 йил қишидан Россия армияси “Укрэнерго” объектларига ҳужум қила бошлади. Биз мамлакатнинг энергияга бўлган эҳтиёжининг 40 фоизини таъминловчи компаниямиз. Магистрал тармоқнинг ярмидан кўпи ҳамда мамлакатдаги деярли барча иссиқлик ва гидроэлектр станциялари шикастланган. Ўша қишда “Укрэнерго” подстанцияларни, транспорт узелларини тиклашга ва шикастланган электр станцияларини қисман таъмирлашга муваффақ бўлди.
Айни пайтда Россия Қуролли кучлари Shahed дронлари ва бошқа камикадзе дронлари ёрдамида электр станциялари ва подстанцияларга ҳужум қилмоқда. "Укрэнерго" транспорт тармоғи барқарор ишлаяпти ва исталган ҳудудга керакли миқдорда электр энергиясини етказишга қодир. Лекин бизда электр энергияси ишлаб чиқаришда катта муаммолар бор.
Украина Президенти айтганидек, биз 9 гигаваттдан ортиқ электр энергияси ишлаб чиқаришни йўқотдик. Бу куч, масалан, Венгрия ёки Словакия ҳамда Болтиқбўйи мамлакатларини энергия билан таъминлаш учун етарли. Шу боис, ҳозир катта камомад бор ва биз оператор сифатида истеъмолчилар учун электр энергиясини вақтинчалик узилишлар жадвалларини амалга оширишимиз керак", — деди Владимир Кудрицкий.
Изоҳ (0)