Isroil armiyasi G‘azo shahrining 1 millionga yaqin aholisini evakuatsiya qilish rejalari haqida sektordagi xalqaro gumanitar tashkilotlar va tibbiyot muassasalarini ogohlantirdi. Bu haqda BBC xabar berdi.
Ta’kidlanishicha, bu harakat G‘azo shahrida o‘tkazilishi kutilayotgan harbiy amaliyotlar oldidan amalga oshirilmoqda. Rasmiylar G‘azoning janubidagi kasalxonalar bemorlarni qabul qilishga tayyorlanayotganini bildirgan. Biroq sektorni boshqarayotgan HAMAS guruhiga tegishli Sog‘liqni saqlash vazirligi bu rejalarni keskin tanqid qilib, bu tibbiyot tizimini butunlay izdan chiqarishini aytgan.
BMT ma’lumotlariga ko‘ra, G‘azodagi 36 ta shifoxonadan 18 tasi hozirda qisman ishlaydi. Ulardan 11 tasi G‘azo shahri gubernatorligida va bittasi Shimoliy G‘azo gubernatorligida joylashgan. Sektordagi aksariyat insonparvarlik tashkilotlari Isroilning bu harakati katta gumanitar falokatga olib kelishini ta’kidlab, G‘azo shahrida qolib, yordam ko‘rsatishni davom ettirishini ma’lum qilgan. Ularning aytishicha, janubdagi kasalxonalar allaqachon haddan ortiq yuklama ostida ishlamoqda.
G‘azo shahrining sharqiy hududlarida 21-avgust kuni kuchli bombardimonlar bo‘lib o‘tgani xabar qilingan. HAMASga qarashli fuqarolik mudofaa xizmati ma’lumotlariga ko‘ra, ushbu zarbalar oqibatida 48 kishi halok bo‘lgan. Shaharda ko‘plab dronlar havoda aylanib, aholiga janubga ko‘chish haqida ogohlantirmoqda. Biroq ayrim mahalliy aholi vakillari u yerlarni ham xavfsiz deb hisoblamaydi.
“Ko‘pchilik shahardan ko‘chib ketmaslik niyatida. Ular bizni o‘ldirsa, uyimizda o‘ldira qolsin”, dedi mahalliy aholi vakillaridan biri.
Izoh (0)