Xalqaro tadqiqotchi jurnalistlar guruhi amerikalik diplomatlar orasida uchraydigan “Gavana sindromi” va Rossiya razvedka xodimlarining harakatlari o‘rtasida bog‘liqlikni aniqladi. Insider, CBS telekompaniyasi va Spiegel jurnali surishtiruv natijalarini e’lon qildi.
Surishtiruv olib borgan jurnalistlar Rossiya razvedkasining 29155-sonli harbiy qism xodimlari sayohati va “Gavana sindromi”ga chalinish holatlari o‘rtasidagi tasodifiy bo‘g‘liqlik yuzasidan dalillar olishga muvaffaq bo‘ldi.
“Gavana sindromi”ning ikki qurboni jurnalistlar e’tiborini tortdi. Ular Rossiya Bosh razvedkasi xodimlari ekani ta’kidlanmoqda. Aynan ular amerikalik diplomatlar sindrom alomatlarini (boshda tovush eshitilishi, bosh aylanishi, muvozanatni yo‘qotish) boshdan kechirgan joy va vaqtlarda bo‘lgan. Shunday operatsiyalarda Rossiya razvedkasi xodimlari Aleksandr Mishkin va Denis Sergeyev ishtirok etgan bo‘lishi mumkin. Britaniya hukumati ularni sobiq rossiyalik razvedka xodimi Sergey Skripalning zaharlanishiga aloqadorlikda gumon qilmoqda.
Shuningdek, Rossiya razvedkasiga qarashli Harbiy tibbiyot akademiyasi “Gavana sindromi” keltirib chiqaradigan klinik effektlarni o‘rganayotgani ma’lum bo‘ldi, razvedka guruhining asosiy a’zolaridan biri akustik qurol yaratish bo‘yicha hukumat buyurtmasini olgan, deydi jurnalistlar.
“Gavana sindromi”
Kasallik birinchi marta 2016-yilda, Kuba poytaxtidagi AQSH elchixonasida ishlagan bir guruh amerikalik diplomatlarda bosh aylanishi, kuchli bosh og‘rig‘i va vaqtincha eshitish qobiliyatini yo‘qotish kuzatilganida ma’lum bo‘lgan.
Diplomatlar va razvedka idoralari bunga Rossiya, Xitoy yoki boshqa davlatlarning dushmanona harakatlari sababligini gumon qilgan. 2023-yil mart oyida AQSH razvedka idoralari amerikalik diplomatlarning sirli kasalliklari dushman kuchlarning harakatlari bilan bog‘liqligini “dargumon” deb hisobladi.
Surishtiruv olib borgan jurnalistlar AQSH rasmiylari endi bunday dalillarni o‘zgartirishga imkon beradigan yangi ma’lumotlarga ega bo‘lishiga umid qilmoqda.
Izoh (0)