Бутун дунёда МI6 номи билан танилган Британия ташқи разведка хизматига илк бор аёл раҳбар — 47 ёшли Блейз Метревели тайинланмоқда. Бу ҳақда BBC хабар берди.
У кузда амалдаги разведка раҳбари Ричард Мур ўрнини эгаллайди. Метревели 1999 йилда Кембриж университетида таҳсил олаётган пайтда разведка хизматига ишга кирган. Фаолиятининг катта қисмини Яқин Шарқ ва Европада ўтказган.
Ҳозирда у МI6 да технологиялар ва инновациялар бўлимига раҳбарлик қилмоқда. Бу лавозим жамоатчиликда “Q” номи билан танилган раҳбарият доирасига киради. Бунгача у Британиянинг ички хавфсизлик хизмати — МI5 да турли раҳбарлик лавозимларида фаолият юритган.
МI6 хорижда маълумот тўплаш, душман давлатларга қарши кураш ва терроризмга қарши чораларни мувофиқлаштириш билан шуғулланади. 2021 йилда “директор K” тахаллуси остида The Telegraph газетасига берган интервьюсида Метревели Британияга таҳдид Россиянинг ўзи эмас, балки унинг сиёсати эканини таъкидлаганди. Шунингдек, у Хитой дунёни ўзгартираётгани боис бу Британия учун катта имконият ҳам, хавф ҳам эканини қайд этган.
Буюк Британия бош вазири Кир Стармер Метревелининг тайинланишини тарихий ҳодиса деб атаб, айни пайтда разведка хизмати фаолияти ҳар қачонгидан ҳам муҳимроқ эканини таъкидлаган. МI6 ни сўнгги беш йил давомида бошқарган Ричард Мур ҳам бу тайинловни тарихий деб баҳолади.
Блейз — юқори малакали разведкачи ва етакчи. У технологиялар соҳасида энг илғор ақл эгаларидан биридир, деган у.
Изоҳ (0)