Rossiya prezidentining matbuot kotibi Dmitriy Peskov Rossiya Bosh shtabi Bosh boshqarmasining “Gavana sindromi” deb ataladigan kasallikka aloqadorligi haqidagi ayblovlarni rad etib, ularni asossiz deb atadi. Bu haqda Euronews xabar berdi.
Hech kim hech qachon bu asossiz ayblovlar haqida ishonchli dalillarni e’lon qilmagan yoki bildirmagan. Shuning uchun bularning barchasi OAV tomonidan asossiz ayblovdan boshqa narsa emas, — dedi Peskov.
Avvalroq surishtiruv olib borgan jurnalistlar Rossiya razvedkasining 29155-sonli harbiy qism xodimlari sayohati va “Gavana sindromi”ga chalinish holatlari o‘rtasidagi tasodifiy bog‘liqlik yuzasidan dalillar olishga muvaffaq bo‘lgani aytilgan edi.
“Gavana sindromi”ning ikki qurboni jurnalistlar e’tiborini tortgan. Ular Rossiya Bosh razvedkasi xodimlari ekani ta’kidlangan. Britaniya hukumati Rossiya razvedkasi xodimlari Aleksandr Mishkin va Denis Sergeyevni sobiq rossiyalik razvedka xodimi Sergey Skripalning zaharlanishiga aloqadorlikda gumon qilgan.
Shuningdek, Rossiya razvedkasiga qarashli Harbiy tibbiyot akademiyasi “Gavana sindromi” keltirib chiqaradigan klinik effektlarni o‘rganayotgani, razvedka guruhining asosiy a’zolaridan biri akustik qurol yaratish bo‘yicha hukumat buyurtmasini olgani aytilgan.
“Gavana sindromi”
Kasallik birinchi marta 2016-yilda, Kuba poytaxtidagi AQSH elchixonasida ishlagan bir guruh amerikalik diplomatlarda bosh aylanishi, kuchli bosh og‘rig‘i va vaqtincha eshitish qobiliyatini yo‘qotish kuzatilganida ma’lum bo‘lgan.
Diplomatlar va razvedka idoralari bunga Rossiya, Xitoy yoki boshqa davlatlarning dushmanona harakatlari sababligini gumon qilgan. 2023-yil mart oyida AQSH razvedka idoralari amerikalik diplomatlarning sirli kasalliklari dushman kuchlarining harakatlari bilan bog‘liqligini “dargumon” deb hisoblagan.
Izoh (0)