Toshkent viloyatining Yangiyo‘l shahrida jonivorga nisbatan shavqatsiz munosabatda bo‘lgan shaxs jazolandi. Bu haqda Toshkent viloyati IIBB matbuot xizmati xabar berdi.
21-avgust kuni Matiz haydovchisi yo‘lda yotgan itni bosib ketgani aks etgan video tarqalib, jamoatchilik muhokamalariga sabab bo‘lgandi. Unda haydovchi itni avtomobil old va orqa g‘ildiraklari bilan bosib o‘tgach yo‘lida xotirjam davom etgani ko‘ringan. Ijtimoiy tarmoq foydalanuvchilari buning oqibatida it nobud bo‘lganini bildirgandi.
Jonivorga nisbatan shavqatsiz munosabatda bo‘lgan Matiz haydovchisi — 1970-yilda tug‘ilgan S.M. Ma’muriy javobgarlik to‘g‘risidagi kodeksning 111-moddasiga asosan javobgarlikka tortildi. Boshqarma matbuot xizmatining “Daryo” so‘roviga ko‘ra aniqlik kiritishicha, u 1 million 236 ming so‘m jarima to‘ladi.
Ushbu moddada hayvonlarga nisbatan shafqatsiz munosabatda bo‘lish, ya’ni ularni g‘arazli yoki boshqa past niyatlarda qiynoqqa solish yoki ularga azob berish, BHMning 3 baravaridan 5 baravarigacha (1 million 236 ming so‘mdan 2 million 60 ming so‘mgacha) miqdorda jarima solishga sabab bo‘lishi belgilangan.
Jinoyat kodeksining 202-1-moddasiga ko‘ra, hayvonlarga nisbatan shavqatsiz munosabatda bo‘lish ma’muriy javobgarlikdan keyin sodir etilgan bo‘lsa, BHMning 50 baravarigacha (20 million 600 ming so‘mgacha) jarima yoki 6 oygacha ozodlikdan mahrum qilish bilan jazolanadi.
Izoh (0)