Eron Buyuk Britaniya mudofaa vaziri Grant Shepps va Kiprdagi Akrotiri aviabazasini sanksiyalar ro‘yxatiga kiritdi. Bu haqda Tasnim xabar berdi.
Sanksiylar Britaniya qurolli kuchlari boshliqlari, aviabaza qo‘mondonlari va uch kompaniyaga nisbatan ham qo‘llanilgan. Bunga Britaniyaning Isroilni qo‘llab-quvvatlagani sabab bo‘lgan. Eron buni “tinchlik va xavfsizlikka qarshi terrorchilik harakatlarini” targ‘ib qilish deb baholamoqda.
Eron Britaniya rejimi va sanab o‘tilgan shaxslarning Isroil sodir etgan terrorchilik harakatlarini qo‘llab-quvvatlashdagi harakatlarini qoralaydi. Bu Britaniyaning terrorizmga qarshi kurash bo‘yicha xalqaro majburiyatlarini va BMT nizomidagi xalqaro huquqning asosiy tamoyillarini ochiqdan ochiq buzish ekanini bildiradi, — deyiladi Eron Tashqi ishlar vazirligi bayonotida.
Cheklovlarga Britaniya harbiy razvedkasi rahbari Edrian Berd, Qurolli kuchlar strategik qo‘mondonligi rahbari Jeyms Hokenhall va qirollik armiyasining boshqa yuqori martabali amaldorlari kirgan. Sanksiyalar Britaniyaning HMS Diamond esminetsi, uning qo‘mondoni Piter Evans, shuningdek, HMS fregati qo‘mondoni Richmond Richard Kempga nisbatan joriy etilgan. Londonga ko‘ra, kemalar Yaman husiylarining hujumlari munosabati bilan Qizil dengizda navigatsiya xavfsizligini ta’minlaydi.
Britaniya aprel oyida Eronga qarshi sanksiyalar kiritishda AQSHga qo‘shildi. Ular orasida Mudofaa vaziri Muhammad Rizo Ashtiyani, Qurolli kuchlar bosh shtabi va Islom inqilobi qo‘riqchilari korpusi dengiz kuchlari ham bor edi.
Britaniya yanvar oyidan beri husiylarning Qizil dengizdagi kemalarga qilgan hujumlariga AQSH bilan birga javob qaytarmoqda. Xususan, Yamandagi nishonlarga hujumlar uyushtirilmoqda. Britaniya Isroilga aprel oyi o‘rtalarida, Isroil hududiga yuzlab dronlar va raketalar uchirilganida Eronning hujumiga qarshi kurashishda yordam bergan.
Izoh (0)