O‘zbekiston Tashqi ishlar vazirligi Isroilning Eronga hujumlari yuzasidan xavotir bildirdi.
Vazirlik barcha tomonlarni to‘liq vazminlikka, harbiy harakatlarni darhol to‘xtatishga va nizoni siyosiy-diplomatik yo‘l bilan hal etishga chaqirmoqda. Shuningdek, mojaroning keskinlik darajasini kamaytirish bo‘yicha sa’y-harakatlarga ko‘maklashishga tayyorligini bildirgan.
“O‘zbekiston Respublikasi Tashqi ishlar vazirligi insonlarning halokatiga va Yaqin Sharqda vaziyatning keskinlashuviga olib kelgan Isroilning Eron Islom Respublikasiga qarshi harbiy amaliyoti yuzasidan chuqur xavotir bildiradi.
Barcha tomonlarni to‘liq vazminlikka, harbiy harakatlarni darhol to‘xtatishga va nizoni siyosiy-diplomatik yo‘l bilan hal etishga chaqiramiz.
Keng ko‘lamli to‘qnashuvga olib kelishi mumkin bo‘lgan jiddiy vaziyatning yanada keskinlashuvi xavotir uyg‘otmoqda.
O‘zbekiston mintaqaviy barqarorlikni mustahkamlashga sodiqligini yana bir bor tasdiqlaydi va mojaroning keskinlik darajasini kamaytirish bo‘yicha sa’y-harakatlarga ko‘maklashishga tayyorligini bildiradi”, deyiladi munosabatda.
Isroil 13-iyunga o‘tar kechasi Eronga yirik ko‘lamda hujum uyushtirib, mamlakat yadroviy dasturining asosiy obyektlari va yuqori martabali harbiy rahbarlarini nishonga oldi. Mamlakat favqulodda holat e’lon qilib, havo hududini yopdi. Isroil Erondan javob hujumini kutmoqda. Eron Isroil hujumlariga qat’iy javob qaytarishni va’da berdi.
O‘zbekistonning Isroildagi elchixonasi ehtimoliy raketa hujumlari sabab bilan fuqarolariga tezkor ehtiyot choralarini ko‘rishni qat’iy tavsiya qildi. Erondagi elchixona ham xavfsizlik choralariga qat’iy rioya qilishga chaqirdi
Eron havo hududi yopilgani sabab shu kuni Uzbekistan Airways aviakompaniyasining Toshkent—Jidda yo‘nalishidagi HY5343 reysi, Fly Dubai aviakompaniyasining Toshkent—Dubay yo‘nalishidagi FZ1942 reysi Toshkentga qaytishga majbur bo‘ldi.
Air Cairo aviakompaniyasining Olmaota—Sharm ash-Shayx yo‘nalishi bo‘yicha SM882 reysi va Qatar Airways aviakompaniyasining Seul—Doha yo‘nalishi bo‘yicha QR8985 reysi Toshkent aeroportiga favqulodda qo‘ndi.
Bundan tashqari, Eron havo hududi yopilgani sabab 13-iyunda Toshkentdan uchadigan:
- Fly Dubai aviakompaniyasining Dubay—Toshkent—Dubay yo‘nalishi bo'yicha FZ-1945/1946 reyslari;
- Air Arabia aviakompaniyasining Sharja—Toshkent—Sharja yo‘nalishi bo‘yicha G9-270/271 reyslari;
- Asia Union aviakompaniyasining Toshkent—Madina—Toshkent yo‘nalishi bo‘yicha 7q-141/142 reyslari bekor qilindi.
Izoh (0)