O‘zbekistonning Erondagi elchixonasi ushbu mamlakatda istiqomat qilayotgan o‘zbekistonliklarga 13-iyun kuni ogohlantirish bilan chiqdi.
Unda Eron atrofidagi vaziyatning keskinlashishi, raketa otishmalari kutilishi munosabati bilan Erondagi O‘zbekiston fuqarolariga xavfsizlik choralariga qat’iy rioya qilish, shuningdek, Eron hukumati va O‘zbekiston elchixonasi rasmiy xabarlarini muntazam ravishda kuzatib borish tavsiya qilindi.
“Shaxsingizni tasdiqlovchi hujjatlar va O‘zbekiston elchixonasining aloqa ma’lumotlarini doimo o‘zingiz bilan olib yuring”, deyiladi xabarda.
Agar sizga shoshilinch yordam yoki maslahat kerak bo‘lsa, O‘zbekistonning Tehrondagi elchixonasiga quyidagi telefonlar orqali murojaat qilish mumkin:
Favqulodda yordam telefonlari:
- 22299780
- 22832025
Elektron pochta: iri.uzembassy@mfa.uz
O‘zbekistonning Isroildagi elchixonasi ehtimoliy raketa hujumlari sabab bilan o‘zbekistonliklarga tezkor ehtiyot choralarini ko‘rishni qat’iy tavsiya qilgandi.
Isroil 13-iyunga o‘tar kechasi Eronga yirik ko‘lamda hujum uyushtirib, mamlakat yadroviy dasturining asosiy obyektlari va yuqori martabali harbiy rahbarlarini nishonga oldi. Isroil keyingi harakatlarga tayyorgarlik ko‘rish maqsadida o‘n minglab askarlarni jalb qilayotgani ta’kidlangan. Mamlakat favqulodda holat e’lon qilib, havo hududini yopdi. Isroil Erondan javob hujumini kutmoqda.
Eron Isroil hujumlariga qat’iy javob qaytarishni va’da berdi. “Dushmanlar qurolli kuchlardan qat’iy javob kutsin. Qurolli kuchlarimiz bunga har tomonlama tayyor va albatta qat’iy javob beradi”, degan Eron qurolli kuchlari generali Abolfazl Shekarchi.
Eron havo hududi yopilgani sabab 13-iyun kuni Uzbekistan Airways’ning Toshkent—Jidda reysi va Fly Dubai’ning Toshkent—Dubay reysi ortga qaytarildi. Shuningdek, Air Cairo’ning Olmaota—Sharm ash-Shayx reysi va Qatar Airways’ning Seul—Doha reysi Toshkentga favqulodda qo‘ndi.
Izoh (0)