Falastin rahbariyati AQSH prezidenti Donald Tramp, Saudiya Arabistoni va mintaqadagi boshqa hamkorlar bilan birgalikda tinchlikka erishish yo‘lida ish olib bormoqda. Bu haqda Falastinning BMTdagi doimiy kuzatuvchisi o‘rinbosari Majed Bamiya BMT Xavfsizlik kengashining Yaqin Sharqdagi vaziyatga bag‘ishlangan majlisida ma’lum qilgan.
“Biz prezident Tramp, Saudiya Arabistoni va mintaqadagi hamkorlarimiz bilan tinchlikka erishish uchun hamkorlik qilmoqdamiz. Tinchlikka erishishning yo‘li ikki davlat tamoyili asosida hal etishdir. 1967-yil chegaralarida mustaqil Falastin davlati tashkil etilmasa, mojaroni hal qilishning imkoni yo‘q. Biz o‘z mustaqil davlatimizni barpo etishga haqlimiz va xalqimizning ko‘chirilishini qat’iyan rad etamiz”, dedi diplomat.
“Biz Yaqin Sharqda tinchlik va adolat qaror topishini istaymiz. Isroilning xavfsizligi falastinliklarning qoni evaziga ta’minlanmasligi va inson qadr-qimmatini hurmat qilish zarur”, deya ta’kidlagan Bamiya.
Diplomatning aytishicha, BMT rezolyutsiyalarini bajarish va G‘azoda o‘t ochishni to‘xtatishga erishish lozim.
“G‘azo sektorida Falastin hukumati xalqaro qo‘llab-quvvatlash bilan faoliyat yuritishi kerak, Isroil esa bunga to‘sqinlik qilmoqda”, deya xulosa qildi u.
18-mart kuni Isroil armiyasi G‘azo sektorida joriy yilning yanvar oyida o‘rnatilgan o‘t ochishni to‘xtatish rejimini bekor qilib, harbiy harakatlarni qayta boshladi. Qatar, Misr va AQSH vositachiligidagi bir necha bosqichli muzokaralardan so‘ng mojaro tomonlari yangi kelishuv shartlarini kelishib ololmadi. 24-iyun kuni Qatar bosh vaziri va tashqi ishlar vaziri shayx Muhammad bin Abdulrahmon Al-Soniy Isroil va HAMAS vakillari yaqin kunlarda mojaroni hal qilish bo‘yicha bilvosita muzokaralar o‘tkazishni rejalashtirayotganini ma’lum qildi.
Izoh (0)