Falastin Futbol Assotsiatsiyasi (FFA) 2026-yilgi Jahon chempionati saralashi 3-bosqichida yuz bergan bahsli penalti qaroridan norozi bo‘lib, FIFA va Osiyo Futbol Konfederatsiyasiga (OFK) rasmiy shikoyat yubordi.
Muammoli holat 10-iyun, seshanba kuni Falastin va Ummon terma jamoalari o‘rtasida o‘tkazilgan hal qiluvchi o‘yinda yuz berdi. Falastin jamoasi 1:0 hisobida oldinda borayotgan bir paytda, eronlik hakam Moud Bonyadifard qo‘shimcha vaqtda — aniqrog‘i, 90+7-daqiqada Ummon foydasiga penalti belgiladi.
Ummonlik futbolchi Issam Al Sabhi penalti zarbasini aniq amalga oshirib, hisobni 1:1 ko‘rinishga keltirdi. Ushbu durang natija Ummonni saralash bosqichining keyingi davrasiga olib chiqdi, Falastin esa saralashni shu yerda tugatishga majbur bo‘ldi.
FFA o‘z bayonotida shunday dedi:
Rasmiy o‘yin yozuvlari hamda ijtimoiy tarmoqlarda tarqalgan turli videolavhalarni sinchiklab o‘rgangan holda shuni ta’kidlaymizki, penalti qarori zarur hakamlik mezonlariga javob bermaydi. Texnik jihatdan bunday holatda penalti belgilanishi asossiz edi. Ushbu qaror bizning terma jamoamizga nisbatan adolatsizlik bo‘ldi.
Falastin Futbol Assotsiatsiyasi FIFA va OFKni ushbu holat yuzasidan to‘liq surishtiruv o‘tkazishga va hakamlik protseduralarini qayta ko‘rib chiqishga chaqirdi. Ularning ta’kidlashicha, bu kabi choralar sport adolatini tiklash hamda xalqaro musobaqalarning halolligini ta’minlash uchun zarur.
Falastin ham, Ummon ham bungacha hech qachon Jahon chempionatida ishtirok etmagan. Hozirda Ummon 2026-yilda AQSh, Kanada va Meksikada bo‘lib o‘tadigan kengaytirilgan (48 jamoali) turnirga yo‘llanma olish imkoniyatini saqlab qolmoqda.
Saralashning keyingi bosqichida Ummon uch jamoali guruhda ishtirok etadi va Indoneziya, Iroq, Qatar, Saudiya Arabistoni yoki Birlashgan Arab Amirliklaridan ikkita jamoa bilan bahs olib boradi. Agar Ummon guruhda g‘oliblikni qo‘lga kiritsa, bu jamoa tarixda ilk bor Jahon chempionatiga yo‘l olish imkoniga ega bo‘ladi.
Izoh (0)