AQSH prezidenti Donald Tramp 2-iyul kuni Qo‘shma Shtatlar Vyetnam bilan savdo kelishuviga erishganini ma’lum qildi. Bu haqda CNN xabar berdi.
Ikki mamlakat o‘rtasidagi bu bitim 9-iyulda imzolanishi rejalashtirilgandi.
“Men hozirgina Vyetnam bilan savdo bitimini imzoladim”, deb yozgan Tramp Truth Social’da.
Vyetnam AQSHga eksport qilinadigan barcha mahsulotlarga 20 foiz boj to‘laydi. Agar mahsulotlar boshqa mamlakatlardan Vyetnam orqali qayta yuklanib AQSHga jo‘natilsa, 40 foiz boj olinadi. AQSHning 20 foizlik tarif stavkasi Vyetnam va boshqa davlatlarning joriy minimal tarif stavkalaridan ikki baravar yuqoridir.
“Vyetnam bunga javoban ilgari hech qachon qilmagan ishni qiladi. AQSHga savdo uchun o‘z bozorlariga to‘liq kirish imkoniyatini beradi. Boshqacha aytganda, ular Qo‘shma Shtatlarga o‘z bozorini ochadi. Biz o‘z mahsulotimizni Vyetnamga nol tarif bo‘yicha sotishimiz mumkin bo‘ladi”, deya qo‘shimcha qilgan savdo vaziri.
Kelishuv rasman tuzilgani yoki Vyetnam Tramp e’lon qilgan shartlarga rozi bo‘lgani darhol ma’lum bo‘lmagan. Vyetnamning Vietnam News nashri mamlakat bosh kotibi To Lam va Tramp 2-iyul kuni kelishuv shartlarini maslahatlashish uchun telefon orqali suhbatlashgani haqida xabar bergan.
“Lam AQSH tez orada Vyetnamni bozor iqtisodiyoti sifatida tan olishni va ayrim yuqori texnologiyali mahsulotlar eksportiga qo‘yilgan cheklovlarni olib tashlashni ma’lum qilgan”, deyiladi nashr xabarida.
Oq uy hozircha Tramp e’lon qilgan bitim tafsilotlari haqida biror xabar e’lon qilgani yo‘q. AQSH 2024-yili Vyetnamdan 137 milliard dollarlik mahsulot import qilgan. Bu 5 yil oldin AQSHga eksport qilingan tovarlar qiymatidan ikki baravar ko‘p.
Izoh (0)