So‘nggi 24 soat ichida Isroilning G‘azo sektori bo‘ylab uyushtirgan hujumlari oqibatida kamida 80 kishi halok bo‘lib, deyarli 400 kishi jarohatlandi. Bu haqda Al Jazeera xabar berdi.
Bosib olingan G‘arbiy Sohildagi Kafr Malek shahriga isroillik ko‘chmanchilar hujumi oqibatida 3 falastinlik halok bo‘lib, bir necha kishi yaralangan. Isroil harbiylari Nablus shahriga bostirib kirib, kamida 14 nafar falastinlikni hibsga olgan. Hibsga olinganlar orasida jurnalist Mujohid Tabanja ham borligi aytilgan. Reyd davomida ismi oshkor etilmagan 2 ta erkak ham qo‘lga olingan. Isroil harbiylari ularni ko‘zi bog‘langan holda olib ketgani aytilgan.
Mahalliy manbalarga ko‘ra, o‘nlab isroillik ko‘chmanchilar shaharga hujum qilganda aholi ularga qarshi chiqishga uringan. Oqibatda ko‘chmanchilar avtomobil va uylarga o‘t qo‘ygan. Falastin Qizil yarim oy jamiyati o‘qdan yaralangan kamida 5 nafar falastinlikni davolagani, ba’zilarining ahvoli og‘irligini aytgan. Isroil kuchlari tomonidan bosib olingan Sharqiy Quddus shimolidagi Shu’fat qochqinlar lageriga reyd paytida 66 yoshli ayolning boshiga o‘q uzgan.
Defence for Children International — Palestine bolalar huquqlarini himoya qilish tashkiloti bosib olingan G‘arbiy Sohilda Isroil harbiylari tomonidan 13 yoshli bolaning o‘ldirilishi tafsilotlarini e’lon qilgan.
Ammar Motaz Mustafo Hamayel ko‘chmanchilar hujumiga uchragan Falastinning Kafr Malek qishlog‘i yaqinida do‘sti bilan ketayotganda isroillik harbiylar tomonidan o‘qqa tutilgan. Isroil kuchlari qarag‘ay daraxtlari orasiga yashiringan 13 yoshli bola va uning do‘stiga 500-1000 metr masofadan o‘q uzgan. O‘q Ammorning orqasidan kirib, bo‘ynidan teshib chiqqan.
Isroilliklar Ammarni otishma sodir bo‘lgan joyda taxminan 2 soat ushlab turgan. So‘ngra u tez yordam brigadasiga topshirilib, kasalxonaga olib kelinganda shifokorlar uning o‘lganini aytgan. Harbiylar hodisa joyida Ammarga yordam berishga uringan bir nechta oila a’zolari va qo‘shnilarini kaltaklagan.
Yana bir hodisada Falastin Sog‘liqni saqlash vazirligi Isroil qo‘shinlari al-Yamun shahridagi reyd paytida 15 yoshli falastinlik Rayan Tamer Xushi otib o‘ldirganini bildirgan. Shu bilan bosib olingan G‘arbiy Sohilda Isroil kuchlari tomonidan o‘ldirilgan falastinlik bolalar soni 29 taga yetgan.
Izoh (0)