Isroil qo‘shinlari 17-iyun kuni G‘azo yordam markazlarida kamida 70 nafar falastinlikni tank snaryadlari, pulemyotlar va dronlardan o‘qqa tutib, o‘ldirdi. Bu haqda Al Jazeera xabar berdi.
Hodisa oqibatida yana yuzlab odamlar jarohatlangani aytilgan. Isroil va AQSH tomonidan qo‘llab-quvvatlanadigan G‘azo gumanitar jamg‘armasi (G‘GJ)da uch haftadirki, aholi qirg‘ini to‘xtatgani yo‘q.
Qurbonlar soni ortishi kutilmoqda, chunki jabrlanganlarning ko‘pchiligi og‘ir ahvolda, deb xabar bermoqda Nosir shifoxonasi shifokorlari. G‘azo fuqarolik mudofaasi vakili Mahmud Bassalning qo‘shimcha qilishicha, 200 dan ortiq odam jarohatlangan, biroq qurbonlar soni haqidagi ma’lumotlar turlicha.
“Isroil dronlari fuqarolarga qarata o‘t ochdi. Bir necha daqiqadan so‘ng tanklar snaryadlar otishni boshladi. Oqibatda ko‘plab qurbonlar qayd etildi”, deyilgan bayonotda.
16-iyun kuni Xon Yunus janubidagi Rafah hududida 38 kishi halok bo‘lgandi. Ma’lumotlarga ko‘ra, 26-may kuni G‘azoda operatsiyalarni boshlaganidan beri G‘GJdan yordam olishga uringan 300 dan ortiq odam halok bo‘lgan va 2 000 dan ortiq kishi yaralangan.
Birlashgan Millatlar Tashkiloti rahbari Antonio Guterrish so‘nggi qotilliklardan keyin G‘GJni javobgarlikka chaqirgan. Hodisada omon qolganlar dahshatli manzaralarni tasvirlab bergan.
“O‘nlab tinch aholi, jumladan, bolalar halok bo‘ldi. Hech kim yordam bera olmadi yoki hayotlarini saqlab qola olmadi”, dedi 38 yoshli tirik qolgan Said Abu Liba.
Voqeani “qirg‘in” deb atagan Yusuf Nofalning aytishicha, u yerda qimirlamay yotgan va qonga belangan ko‘plab odamlarni ko‘rgan. Askarlar qochayotgan odamlarga qarata o‘q uzishda davom etgan. Jahon sog‘liqni saqlash tashkiloti 17-iyun kuni o‘zining bir nechta ishlaydigan shifoxonalarini saqlab qolish uchun G‘azoga yoqilg‘i kiritishni so‘rab murojaat qilgan.
“100 kundan ortiq vaqt davomida G‘azoga yoqilg‘i kirmadi va evakuatsiya zonalaridan zaxiralarni olib chiqishga urinishlar rad etildi”, dedi JSSTning Falastin hududlaridagi vakili Rik Peeperkorn.
Unga ko‘ra, G‘azodagi 36 ta shifoxonadan atigi 17 tasi hozirda qisman ishlaydi. Ularda jami 1 500 ga yaqin o‘rin bor — bu Isroilning G‘azoga qarshi urushi boshlanishidan oldingi ko‘rsatkichdan taxminan 45 foizga kam.
Izoh (0)