Eron AQSHdan “qasos” olish sifatida 23-iyun kuni Qatardagi Amerika Qo‘shma Shtatlari harbiy bazasiga hujum qilgani ma’lum. Ba’zi tahlilchilarning fikricha, Eronning “nisbatan cheklangan” javobi AQSH bilan keskinlikni yumshatish istagidan darak bersa-da, ko‘plab davlatlar hujumni keskin qoralagan. Quyida turli davlatlar tomonidan e’lon qilingan ba’zi bayonotlar keltirib o‘tilgan.
AQSH
AQSH prezidenti Donald Tramp Truth Social ijtimoiy tarmog‘ida shunday yozdi: “Eron yadroviy inshootlarni yo‘q qilishimizga juda zaif javob berdi. Biz buni kutgan edik va juda samarali qarshilik ko‘rsatdik. 14 ta raketa otilib, ulardan 13 tasi urib tushirilgan, 1 tasi esa xavfli bo‘lmagan hududga yo‘naltirilgan edi. Shuni mamnuniyat bilan ma’lum qilamanki, hech bir amerikalik jabrlanmadi va deyarli hech qanday zarar ko‘rmadi. Umid qilamanki, boshqa NAFRAT bo‘lmaydi. Men Eronga erta ogohlantirgani uchun minnatdorchilik bildirmoqchiman. Bu hech kimning hayotiga zarar yetkazmay, hech kim jarohatlanmasligiga imkon berdi. Ehtimol, Eron endi mintaqada tinchlik va totuvlikni ta’minlashi mumkin va men Isroilni ham shunga undayman. E’tiboringiz uchun tashakkur!”
Eron
Eron oliy rahnamosi Oyatulloh Ali Xomanaiy X ijtimoiy tarmog‘ida post qoldirdi: “Biz hech kimga zarar yetkazmadik. Va biz hech kimdan, hech qanday sharoitda hech qanday tazyiqni qabul qilmaymiz. Biz hech kimning tazyiqiga bo‘ysunmaymiz. Bu Eron xalqining tushunchasidir”.
Qatar
“Bosh vazir maslahatchisi, Tashqi ishlar vazirligi rasmiy vakili doktor Majid bin Muhammad al-Ansoriy Qatar davlati Eron inqilobiy gvardiyasi tomonidan Al-Udayd aviabazasiga uyushtirilgan hujumni keskin qoralashini bildirdi. Buni Qatar davlati suvereniteti, havo hududi, xalqaro huquq va Birlashgan Millatlar Tashkiloti nizomini qo‘pol ravishda buzish deb hisobladi. U Qatar xalqaro huquqqa muvofiq, ushbu surbetlarcha tajovuzning tabiati va ko‘lamiga mos to‘g‘ridan to‘g‘ri javob berish huquqini o‘zida saqlab qolishini ta’kidladi”, dedi hukumat vakillari.
Saudiya Arabistoni
“Saudiya Arabistoni Podshohligi Eron tomonidan qardosh Qatar davlatiga qarshi boshlangan, xalqaro huquq va yaxshi qo‘shnichilik tamoyillarini qo‘pol ravishda buzadigan va har qanday sharoitda oqlab bo‘lmaydigan mutlaqo nomaqbul tajovuzni keskin qoralaydi”, deb bayonot bergan hukumat rasmiylari.
Birlashgan Arab Amirliklari
“Birlashgan Arab Amirliklari Eron inqilobiy gvardiyasining qardosh Qatar davlatidagi Al-Udayd aviabazasini nishonga olishini Qatar suvereniteti va havo hududini qo‘pol ravishda buzish, xalqaro huquq va BMT nizomini ochiqdan ochiq buzish deb hisoblab, keskin qoralaydi. BAA Qatar xavfsizligiga tahdid soladigan, mintaqa xavfsizligi va barqarorligiga putur yetkazadigan har qanday hujumni qat’iyan rad etadi”, deb rasmiylar fikr bildirgan.
Bahrayn
“Bahrayn Qirolligi Eronning hududga hujumidan so‘ng birodar Qatar davlatini to‘liq qo‘llab-quvvatlashini tasdiqlaydi. Qirollik qardosh Qatar davlatiga birodarlik va qon rishtalari bilan bog‘langan va u bilan to‘liq birdamligini bildiradi. Bu esa Ko‘rfaz arab davlatlari hamkorlik kengashi mamlakatlarining ushbu nozik sharoitda mintaqa o‘zini tiyish, keskinlashuvga yo‘l qo‘ymaslik va barcha nizolarni tinch yo‘l bilan hal qilish uchun zarur sa’y-harakatlarni amalga oshirishda birdamligini tasdiqlaydi”, deb hodisaga fikr bildirgan davlat vakillari.
Kuvayt
“Kuvayt davlati Eron inqilobiy gvardiyasi tomonidan qardosh Qatar davlatidagi Al-Udayd aviabazasiga uyushtirilgan hujumlarni keskin qoralashini bildiradi. Ushbu hujum Qatar suvereniteti va havo hududini, shuningdek, xalqaro huquq va Birlashgan Millatlar Tashkiloti nizomini qo‘pol ravishda buzish hisoblanadi. Bu mintaqadagi tinchlik, xavfsizlik va barqarorlikka tahdid soluvchi xavfli keskinlashuvdir.
Kuvayt qardosh Qatar davlatidagi birodarlarni, uning rahbariyati, hukumati va xalqini to‘liq qo‘llab-quvvatlashini hamda uning suvereniteti, xavfsizligi va barqarorligini saqlab qolish uchun ko‘rilayotgan barcha choralarni, jumladan, ushbu ochiqdan ochiq tajovuzning ko‘lamiga mos ravishda to‘g‘ridan to‘g‘ri javob berish huquqini to‘liq qo‘llab-quvvatlashini tasdiqlaydi”, deya hisobot berdi Kuvayt hukumati.
Fransiya
Fransiya prezidenti Emmanuel Makron bayonot berib, shunday dedi: “Fransiya Eron tomonidan zarba berilgan Qatar bilan birdam. Men mamlakat hokimiyati va mintaqadagi hamkorlarimiz bilan yaqin aloqadaman. Men barcha tomonlarni maksimal darajada vazmin bo‘lishga, keskinlikni yumshatishga va muzokaralar stoliga qaytishga chaqiraman. Bu boshboshdoqlik tugashi kerak”.
Xitoy
Xitoy tashqi ishlar vaziri Van I 23-iyun kuni AQShning Eron yadroviy obyektlariga hujumlari “dunyoda noto‘g‘ri tushuncha hosil qilgani”ni bildirgan.
“Tomonlari vaziyatni yumshatish, muloqot hamda muzokaralarga qaytish uchun choralar ko‘rishi kerak”, dedi Van I.
Xitoyning Birlashgan Millatlar Tashkilotidagi elchisi Fu Kong shunday deb fikr bildirdi: “Tomonlar kuch impulsini tiyib turishi, ziddiyatlarni kuchaytirish va olovga moy quyishdan qochishi kerak”.
Falastin ma’muriyati
Falastin ma’muriyati 23-iyun kuni e’lon qilgan bayonotida Eronning Qatarga raketa hujumini qoralab, buni Qatar suverenitetining ochiqdan ochiq buzilishi deb atagan. Hukumat Qatar va uning xalqi bilan birdamligini bildirib, Fors ko‘rfazi davlatini qo‘llab-quvvatlashini yana bir bor tasdiqlagan.
Izoh (0)